Drita humb edhe në “Fadil Vokrri” ndaj FCSB, eliminohet nga Liga e Evropës – vazhdon rrugëtimin në “play-off” të Ligës së Konferencës
Humbja 3-1 ndaj FCSB në ndeshjen e kthimit i mbyll dyert e kualifikimit në Ligën e Evropës, por Drita do të kenë një tjetër shans në “play-off” të Ligës së Konferencës.
Drita nuk ia doli të përmbysë disavantazhin ndaj FCSB-së, duke u mposhtur 3-1 në “Fadil Vokrri” në ndeshjen e kthimit të raundit të tretë të Ligës së Evropës.
Rumunët e nisën ndeshjen në mënyrë perfekte, duke kaluar në epërsi në minutën e parë me Juri Cisottin, i cili shënoi me kokë pas një krosimi perfekt.
Vetëm në minutën e 18-të, David Miculescu dyfishoi avantazhin me një goditje të saktë në këndin e poshtëm të djathtë.
Drita pati një moment të diskutueshëm në minutën e 24-t, kur kërkoi penallti, por gjyqtari nuk e akordoi.
Në pjesën e dytë, gjilanasit u rikthyen në lojë me një gol të bukur të Veton Tushës në minutën e 52-të, pas një asistimi të saktë nga krahu, duke e dërguar topin me goditje të ulët në këndin e majtë të portës.
Por shpresat e Dritës morën goditje të rëndë në minutën e 68-të, kur Rron Broja u ndëshkua me karton të kuq për një ndërhyrje të ashpër.
Me një lojtar më pak, Drita e pati të vështirë të mbante ritmin dhe në minutën e 86-të, Dennis Politic vulosi rezultatin 3-1 për FCSB.
Me këtë fitore, FCSB kalon në “play-off” të Ligës së Evropës me rezultat të përgjithshëm 6-3, ndërsa Drita zbret në “play-off” të Ligës së Konferencës, ku do të ketë një tjetër mundësi për të siguruar fazën e grupeve të një gare evropiane.
