Doli nga shtypi Revista “Horizonti” nr. 133, me laryshi temash e lloje enigmash
Në mbështetje të Ministrisë për Kulturë, Rini e Sport të Republikës së Kosovës, doli nga shtypi numri më i ri, 133, i Revistës Enigmatike “Horizonti”.
Në këtë numër lexuesit mund të gjejnë një pasqyrim tekstual nga tribuna enigmatike e mbajtur kohë më parë, si dhe fjalëkryqe tematike skandi dhe lloje tjera të enigmave, të cilat në vete ngërthejnë sfidën e zgjidhjes, gjithnjë me karakter argëtimi e mësimi si imperativ i motos së enigmatikës.
Me përmbajtje tërheqëse e të posacme për admirues, në 32 faqe, me laramani enigmash të llojeve të ndryshme, numri më i ri i “Horizonti”-t nis me fjalën e redaktorit.
Aty theksohet rikthimi i revistës “Horizonti”, pas një kohe të gjatë, me mbështetje fillimisht të DKRS-së në Gjilan, në kuadër të Manifestimit “Flaka e Janarit 2024”, gjegjësisht me garat e enigmatikës, e së fundi me mbështetje të MKRS-së.
“Vitin 2024 e konsiderojmë vit me rëndësi për zhvillimin e enigmatikës, duke iu falënderuar MKRS-së, e cila na ndau mjete financiare për nxjerrjen e 4 numrave të revistës “Horizonti”. Padyshim se vendimi për të ndihmuar shoqatën dhe revistën “Horizonti”, u mor duke pasur parasysh angazhimin e gjatë, që nga vitit 1980, por edhe riaktivizimi i disa prej anëtarëve të shoqatës dhe redaksisë së revistës ”Horizonti”, e më pas organizimin e garave në zgjidhjen e gjëegjëzave, si dhe botimit të veprave të vecanta enigmologjike, (Gjilan, 2023, 2024), pjesëmarrjes në takimet e gjëzakuptuesve në rajon e më gjërë”, thuhet në fjalën e redaktorit.
Më tej potencohet moto e revistës se një nga detyrat kryesore të gjëzësajuesve është kultivimi i identitetit të pupoullit tonë, vecanërisht ruajta e gjuhës letrare shqipe dhe mësimi përmes lojës e argëtimit.
“Dihet se pasuria dhe begatia e gjuhës jeton me popullin aq sa shfrytëzohet, dhe duke marrë parasysh këtë fakt roli i revistës është i padiskutueshëm e i rëndësishëm”, thuhet po aty.
“Obligim tjetër me rëndësi i gjëzakuptuesve ose enigmatëve është popullarizimi i saj në rininë shkollore, ndërsa në revistën “Horizonti”, gjejmë ngjarje të ndryshme kulturore, sportive e historike nga e kaluara por edhe nga e tashmja, aktualja e popullit tonë, sikurse popujve dhe civilizimeve tjera. Aty u botuan gjëza, krijime të ndryshme, por edhe rekorde, jo vetëm kombëtare, të gjëzasajuesve tanë”, shkruan Dr. Zijadin Hasani më tej, në fjalën hyrëse.
PËRMBAJTJA E NUMRIT TË RI (133) TË REVISTËS “HORIZONTI”
Ndonëse përmbajtja e numrit të fundit të revistës “Horizonti”, dominohet me enigma të llojit Fjalëkryqe Skandi, në 32 faqet e revistës në formatit A4 gjejmë edhe lloje tjera të posacme: – Fjalëkryq i vecantë, plotësore anagramore, Fjalëdoku, Rrokjekryq, Asociacion, Anagrame, Rebuese, Mburojë Magjike 7X14, Mburojë Magjike 7X12, si dhe një faqe të tërë me anagrame kushtuar shkrimtarëve të shquar nga Anamorava, nga autori Ismet Shkodra, etj.
Ndërsa në faqen e dedikuar për të rinjë lexuesi i pasionuar i enigmatikës, gjegjësisht “Horizont”-it, mund të gjejë gjëegjëza, kuriozitete etj.
Po aty, në numrin e ri të “Horizonti”-t, përvec enigmave të sajuesve gjinalas, gjejmë edhe të tilla sajime e krijime enigmatike që vijnë nga enigmatë të njohur e të shquar të së kaluarës së begatë të enigmatikës Kosovare, përfshirë autorë si Xhevat Ruhani nga SHBA – kryemjeshtër i enigmatikës, pastaj nga Dr. Mensur Mahmuti nga Tetova, gjithashtu kryemjeshtër i enigmatikës, i cili vjen me një punim tematik dedikuar legjendës së futbollit, Fadil Vokrri.
Padyshim se një pjesë e vecantë eshte dedikuar për pasqyrimin e prezantimit të suksesshëm të enigmatëve Kosovarë, në takimet jubilare (XL), të zgjidhësve dhe sajuesve te enigmave në Rabac të Kroacisë, si dhe një përshkrim nga Rexhep Hasani, përkitazi me garat e enigmave të mbajtura në manifestimin “Flaka e Janarit 2024”, në Gjilan. E po aty gjejme edhe një përkujtim për doajenin e gazetarisë gjilanase, Hasan Bunjaku, i cili ndërroi jetë kohë më parë.
Për ta plotësuar koloritin e mozaikut përmbajtësor të revistës nr. 133, redaksia është kujdesur që të ketë edhe lloje tjera të enigmave, të cilat herë-herë na vijnë mjaft tërheqëse, e herë-herë mjaft të dashura, duke ri-kthyer kësisoji në kujtesë periudhën e shkëlqimit të enigmatikës shqipe në Kosovë e mbarë trojet etnike.
Fjalëkryqi Zviceran është një lloj i enigmave të dashura për aderuesin e pasionuar. E një i tillë është pjesë e përmbajtjes së numrit të fundt të revistës “Horizonti”, në faqe 22, ndërsa në faqen pasuese lexuesi mund të gjejë lloje të poscame të enigmave, ku spikasin punime me figura magjike, si: mburoja magjike, figura magjike, anagrame kushtuar heroit Agim Ramadani etj, ndërsa në faqen pasuese hasim në disa tetëkahore, fjalëkryqe mozaik, plotësore alfabetike, Skandi, gjëegjëza, etj.
S’do mend se revista “Horizonti” nuk do të shquhej si më e vecanta e të gjitha kohërave ndër revistat dhe gazetat e këtij lloji, sikur të mos argëtonte dhe dëfrente lexuesit në vazhdimësi, cdo herë që del një numër i ri!
Ndaj, pa dyshim se Akrostik(-u) pananagramor – shteti amë, është enigma e radhës që e pasuron edhe më përmbajtjen e “Horizonti”-t numër 133, së bashku me rebuset pasuese e Katrorin Magjik 7X7 dhe Katrorin Magjik 8X8, fotplotësorin e mëpastajmë, rebusin spunerizëm (9), rebusin me shkronja, sikurse edhe shkrimin e rikthyer nga shkrimtari Musa Ramadani, Misteri i fjalëkryqit, për t’u përmbyllur në fund me fjalëkryqin skandi, kushtuar sportit, e më tej me fjalëkryqin dedikuar enkas këngëtares Leonora Jakupi nga autori Dr. Mensur Mahmuti.
“Horizonti” nr. 133 është mbështetur nga MKRS, ndërsa është redaktuar nga kolegiumi i redakisë në përbërje: Dr. Zijadin Hasani, kryeredaktor, Rasim Vllasaliu, Xhelal Selmani, Abdylmexhid Selmani, Shemsedin Kryeziu, Rexhep Hasani, Enver Hajrullahu, Mensur Mahmuti e Islam Zuzaku, anëtarë të redaksisë, ndërsa është shtypur nga Shtëpia Botuese “Proart Design”, Gjilan.
