DnV: 1.6 për qind e vendvotimeve u hapën me vonesë, shkak mungesa e komisionerëve
Organizata Demokracia në Veprim (DnV) ka bërë të ditur se 1.6 për qind e vendvotimeve në Kosovë janë hapur me vonesë, kryesisht për shkak të mungesës së komisionerëve.
Në një konferencë për media, Ismet Kryeziu tha se DnV ka angazhuar 550 vëzhgues në terren dhe 50 operatorë në qendrën e thirrjeve për monitorimin e procesit zgjedhor në nivel vendi.
Sipas tij, përveç vonesave në hapje, në disa vendvotime janë evidentuar edhe mungesa të kabinave të votimit, ndërsa në rreth 2 për qind të vendvotimeve janë raportuar probleme me vendosjen e kamerave.
Kryeziu theksoi se në 16 për qind të vendvotimeve nuk ka asnjë grua anëtare të komisionit zgjedhor, ndërsa shqetësuese mbetet edhe qasja e personave me aftësi të kufizuara në qendrat e votimit.
Sipas të dhënave të DnV-së, rreth 19 për qind e qendrave të votimit nuk ofrojnë infrastrukturën e nevojshme për qasje të lehtë për personat me aftësi të kufizuara, duke kufizuar pjesëmarrjen e tyre të plotë në procesin zgjedhor.
Po ashtu, vëzhguesit kanë hasur materiale promovuese të subjekteve politike pranë disa qendrave të votimit, ndonëse rregullat zgjedhore ndalojnë vendosjen e tyre brenda perimetrit prej 100 metrash.
Kryeziu shtoi se, megjithëse Policia e Kosovës është e angazhuar në mbarëvajtjen e procesit, në rreth 10 për qind të vendvotimeve nuk është evidentuar prania e zyrtarëve policorë.
