Dita e ndeshjes: Drita luan në Bukuresht ndaj FCSB, kampioni i Kosovës synon rezultat pozitiv
FCSB dhe Drita përballen sonte në ndeshjen e parë të raundit të tretë kualifikues të Ligës së Evropës, me fillim nga ora 20:30 në “Arena Kombëtare” të Bukureshtit.
Të dyja skuadrat synojnë një rezultat pozitiv për të shtuar gjasat për kualifikim në ndeshjen e kthimit.
Si kampioni rumun ashtu edhe ai kosovar vijnë pas eliminimit nga kualifikueset e Ligës së Kampionëve. FCSB u mposht nga Shkëndija e Tetovës, ndërsa kampioni i Kosovës, Drita, u eliminua nga gjiganti danez, Copenhagen.
Vendasit shihen si favoritë në letër, për shkak të përvojës dhe kualitetit individual, por Drita ka treguar se di të bëjë rezistencë edhe ndaj kundërshtarëve më të fortë dhe do të synojë një rezultat të favorshëm në këtë përballje të parë.
FCSB do të përballet me disa mungesa të rëndësishme, përfshirë mbrojtësin Ngezana dhe mesfushorin Tanase që janë të pezulluar, ndërsa Radunovic është i lënduar. Në dyshim për këtë sfidë janë edhe Olaru dhe sulmuesi Alibec.
As Drita nuk do të jetë e plotë, pasi sulmuesi Liridon Balaj mungon për shkak të pezullimit pas kartonit të kuq ndaj Copenhagen, ndërsa mbrojtësi Juan Mesa mungon për shkak të një lëndimi serioz në ligamentet e gjurit.
Pritet një ndeshje me intensitet të lartë, ku FCSB do të kërkojë të marrë epërsinë para ndeshjes së kthimit, ndërsa Drita do të mundohet të ruajë kompaktësinë dhe të shfrytëzojë kundërsulmet për të befasuar.
