Diplomojnë 279 kadetë të Policisë, Bislimi: Uniforma shpreh atdhedashurinë
279 kadetë të gjeneratës së 62-të të Policisë së Kosovës kanë diplomuar sot dhe do të veshin uniformën e këtij institucioni.
Zëvendëskryeministri në detyrë, Besnik Bislimi, ka thënë se betimi i këtyre kadetëve është premtim për punë me integritet e në interes të vendit.
“Kjo uniformë dhe ky institucion është më shumë se sa zbatuese e ligjit, por edhe përfaqësuese e vlerave të disiplinës dhe punës, integritetit dhe atdhedashurisë. Këta kadetë, në mes të tyre 261 shqiptarë, 11 serbë, 4 boshnjakë, 2 egjiptian dhe 2 turq i përbashkon misioni dhe qëllimet e njëjta”, ka thënë ai.
Ai ka thënë se kryeministri në detyrë, Albin Kurti ndodhet në Bosnje dhe Hercegovinë për të marrë pjesë në ceremoninë e shënimit të 30-vjetorit të gjenocidit në Srebrenicë, andaj Qeveria përfaqësohet nga ana e tij.
“Të gjitha gjeneratat policore, sikurse edhe kjo, për të arritur në këtë ditë historike të diplomimit kanë kaluar nëpër sfida të ndryshme gjatë trajnimit, por falë punës, angazhimit dhe përkushtimit kanë arritur me sukses të finalizojnë dhe të kurorëzojnë këtë ditë të rëndësishme për vendin”, ka thënë zëdhënësi i Policisë së Kosovës, Baki Kelani, teksa ka kërkuar zbatim të ligjit nga ana e tyre.
Në anën tjetër, ministri në detyrë i Punëve të Brendshme, Xhelal Sveçla ka thënë se Policia e Kosovës nuk është vetëm institucioni që ka besimin më të lartë qytetar, por edhe shembull për partneritetet dhe sukseset në luftimin e kriminaliteteve të ndryshme.
Drejtori i Policisë së Kosovës, Gazmend Hoxha ka thënë se për këtë diplomim kanë aplikuar mbi 7 mijë qytetarë dhe kjo është dëshmuese e besimit qytetar ndaj këtij institucioni.
