“Dilni matuni”, “Realiteti është ndryshe”, reagimet e LDK-së pasi u radhitën në vend të tretë në sondazhin e UBO-s
Pas publikimit të sondazhit të fundit mbi zgjedhjet të realizuar nga kompania “UBO Consulting”, nga Lidhja Demokratike e Kosovës janë shprehur të pakënaqur ndaj këtij sondazhi, e madje e kanë cilësuar edhe si fushatë për të sulmuar këtë parti.
Lutfi Haziri në reagimin e tij pretendon për një “fushatë sondazhi për të sulmuar LDK-në”. Kjo, thotë ai vjen pas opozitarizmit racional, punës në terren, interpelancës për tenderët njëburimorë dhe videos së djeshme të kreut të LDK-së, Lumir Abdixhiku.
Ai është shprehur se po punojnë drejt “rikthimit të madh”.
“Një javë pas opozitarizmit racional e të faktuar, punës së jashtëzakonshme në terren me qytetarët, interpelancës për tenderët njëburimor dhe videos së djeshme të kryetarit të LDK-së, paskan tentuar me fushatë ‘sondazhi’ të na sulmojnë. Ne ecim para drejt rikthimit të madh. Nuk ka kush na ndal. Ne kemi vendosur të punojmë deri në ditën e zgjedhjeve pa u ndal. LDK, shpresë e besë për Kosovën!”, ka shkruar Haziri ne “Facebook”.
Një reagim pati edhe nga deputetja Hykmete Bajrami. Ajo tha se këto sondazhe i vijnë qeverisë sa herë që ka ndonjë krizë, duke shtuar se realiteti është ndryshe nga rezultatet.
“Mbajeni në mend, sa herë që ka një krizë, qeverisë i vjen një sondazh i ri. Herën e kaluar në ditën e faturave dyfysh të energjisë elektrike, këtë herë në periudhën e shpërfaqjës së korrupcionit përmes kontratave sekrete e pazareve në katër sy. Duan të paraqesin një realitet tjetër – fiktiv. Të na thonë se ne jemi vet. Se shumica është me ata – të kënaqur si dikur”, ka thënë Bajrami.
Deputeti i LDK-së, Anton Quni, ika thene per media “online’ se janë përralla të porositura.
“Janë përralla të porositura nuk dua të merrem me përralla”.
“Dilni matuni, hajnat e shekullit”, ishte reagimi i deputetit Armend Zemaj.
“Nuk mbrohen 781 tenderët sekret me sondazhe të fabrikuara. Dilni matuni, hajnat e shekullit!“, ka shkruar ai.
Në sondazhin e fundit të realizuar nga kompania UBO Consulting që ka publikuar gazeta online Reporteri.net Lëvizja Vetëvendosje në tre muajt e fundit ka rritje të lehtë me 49.5 për qind, PDK-ja ka rënë pak me 17.1 për qind, ndërsa LDK-ja ka rënie pak më të madhe me 16 për qind, duke u renditur si forca e tretë politike në Kosovë.
Burimi i lajmit: Reporteri.net/
