Deli Hajdini – “Dardani i ri” i Kosovës

Futbollisti i talentuar i VFB Stuttgart U-19, Deli Hajdini, tani do të jetë pjesë e Kosovës.

I pari i FFK-së Agim Ademi përmes një shkrimi në rrjetin social “Facebook” ka njoftuar afrimin e Hajdinit, i cili do t’i bashkohet Kosovës U19.

Ademi i uroi mirëseardhje Hajdinit, që do të jetë opsion për përzgjedhësin Adil Maliqi, qysh në muajin shtator

“Mirësevjen Deli Hajdini

Kam kënaqësinë e madhe t’i uroj mirëseardhje futbollistit të talentuar Deli Hajdini, lojtar i VFB Stuttgart U-19, në Kombëtaren U-19 të Kosovës.

Ky është një tjetër hap i rëndësishëm në vazhdën e sjelljeve të reja dhe premtuese në ekipin kombëtar U-19, veçanërisht para garave të kësaj grupmoshe.

Në nëntor, Kombëtarja e Kosovës e grupmoshës U-19, e udhëhequr nga selektori Adil Maliqi, si pjesë e grupit të 10-të të kualifikimeve për Kampionatin Evropian 2024/25, do të ndeshet me Spanjën, Austrinë dhe Ishujt Faroe, në turnamentin i cili do të mbahet në Kosovë.

Të gjithë ne besojmë në potencialin dhe përkushtimin e Deliut dhe jemi të sigurt që ai do të japë një kontribut të jashtëzakonshëm për suksese të reja.

Forca Kosova!”, shkroi ndër të tjera Ademi.

F. Bytyqi/RTKLive