Çmimet globale të grurit rriten ndërkohë që Rusia sulmon portin e Danubit të Ukrainës
Rusia sulmoi portet e grurit të Ukrainës në orët e hershme të së mërkurës, duke përfshirë një port në brendësi përtej lumit Danub nga Rumania, duke bërë që çmimet globale të ushqimeve të rriten ndërkohë që Moska zyrtare po e shton përdorimin e forcës për ta rivendosur një bllokadë të eksporteve ukrainase.
Ministria e Mbrojtjes e Ukrainës tha se një kapanon drithi u dëmtua në portin e Danubit të Izmail në rajonin e Odesas: “Gruri ukrainas ka potencialin të ushqejë miliona njerëz në mbarë botën,” shkroi ministria në platformën e mesazheve X, e njohur më parë si Twitter.
Nuk ka raportime për viktima, ka shkruar guvernatori i rajonit të Odessa, Oleh Kiper në një postim në aplikacionin e mesazheve Telegram. Kiper postoi disa foto ku shfaqeshin ekipet e zjarrfikësve duke u përpjekur të shuanin zjarrin në një ndërtesë të lartë të djegur pranë një lumi.
Një burim industrial konfirmoi gjithashtu se lokacioni Izmail ishte objektivi kryesor i sulmit, duke e përshkruar nivelin e dëmit si “serioz”.
Zyra e prokurorit të Ukrainës publikoi fotografi ku shhet një hetues i krimeve të luftës jashtë një ndërtese të rrënuar dhe të paktën dy kapanone të dëmtuara me grurë që bien jashtë.
Porti Izmail, përtej lumit nga Rumania anëtare e NATO-s, ka shërbyer si rruga kryesore alternative nga Ukraina për eksportet e grurit që kur Rusia e rivendosi bllokadën e saj de fakto të porteve të Detit të Zi të Ukrainës në mesin e korrikut.
Çmimet e grurit të Çikagos u rritën me 4% pas sulmit të së mërkurës, me tregtarët të shqetësuar sërish për një goditje në furnizimet globale nga largimi i Ukrainës, një nga eksportuesit kryesorë të ushqimit në botë, nga tregu.
Rusia e ka sulmuar pamëshirshëm infrastrukturën bujqësore dhe portuale të Ukrainës për më shumë se dy javë, që kur refuzoi ta vazhdonte një marrëveshje që e kishte hequr bllokadën e saj në kohë lufte të porteve ukrainase vitin e kaluar. Moska ka kërkuar kushte më të mira për eksportet e saj të ushqimit dhe plehrave, të cilat tashmë janë të përjashtuara nga sanksionet financiare ndërkombëtare.
“Armiku… po përpiqet të shkatërrojë grurin ukrainas, duke sulmuar infrastrukturën industriale dhe portuale. Fatkeqësisht, ka goditje, për fat të keq, kapanoni u dëmtua dhe zjarret shpërthyen në vend,” Serhiy Bratchuk, zëdhënës i Ushtrisë Vullnetare të Ukrainës. Jugu, pjesë e forcave të armatosura të Ukrainës, tha në një deklaratë video.
“Rusia po përpiqet të heqë Ukrainën nga marrëveshja e ardhshme e grurit dhe, më e rëndësishmja, të zhvendosë në mënyrë strategjike vendin tonë nga tregu global i ushqimit”, tha ai.
Portet e lumit Danub të Ukrainës përbënin rreth një të katërtën e eksporteve të grurit përpara se Rusia të tërhiqej nga marrëveshja e Detit të Zi dhe që atëherë janë bërë rruga kryesore e daljes, me drithëra të ngarkuara në maune dhe të dërguara në portin e Detit të Zi të Rumanisë, Konstancë për dërgesë e tutje.
Të dielën, media ukrainase raportoi se disa anije të huaja mallrash kishin mbërritur drejtpërdrejt në Izmail nga Deti i Zi, për herë të parë që nga skadimi i marrëveshjes së grurit, duke hapur një shkelje të mundshme në bllokadën e rivendosur rishtazi të Rusisë.
Kombet e Bashkuara kanë paralajmëruar për një krizë të mundshme ushqimore dhe uri në vendet më të varfra të botës si rezultat i vendimit të Rusisë për të braktisur marrëveshjen, të ndërmjetësuar nga OKB-ja dhe Turqia.
Moska thotë se do t’i trajtojë anijet që shkojnë në portet detare të Ukrainës si objektiva të mundshëm ushtarakë. Kievi ka thënë se shpreson se anijet do të kthehen gjithsesi, por deri më tani ata nuk e kanë bërë këtë.
Si rezultat i dështimit të marrëveshjes në mes të korrikut, eksportet e grurit të Ukrainës për këtë muaj kaë rënë me 40% nga qershori, thanë analistët të martën.
Dronët rusë tashmë kishin në shënjestër portin Izmail një herë më parë në fund të korrikut, duke shkatërruar magazinat e grurit.
Që nga largimi nga marrëveshja e grurit, zyrtarët ukrainas kanë thënë se Moska ka goditur 26 objekte portuale, pesë anije civile dhe 180,000 ton grurë në nëntë ditë sulme. Moska ka thënë se sulme të tilla janë ndëshkim për një sulm ukrainas në një urë që Rusia e përdor për ta furnizuar ushtrinë e saj pushtuese në Ukrainën jugore.
Forcat Ajrore të Ukrainës raportuan se Rusia gjithashtu nisi një sulm me dronë në Kiev dhe rajonin përreth gjatë natës. Mbrojtja ajrore rrëzoi 23 dronë, por mbeturinat nga dronët e rrëzuar dëmtuan disa ndërtesa në kryeqytet dhe rajon.
Deri më tani nuk raportohet për viktima./Daily Sabah
Përgatiti: Nuhi Shala
