Brenga e optimizmi, shpërfaqje e “shpirtit të trazuar poetik” në krijimtarinë debutuese të poetes Gane Ahmeti
Duke lexuar krjimtarinë e Gane Ahmetit s’ka se si të mos bie në sy dhe në mendje që kjo poete e re shpreh dy gjëra kryesore e kruciale: brengën dhe optimizmin.
Poetja Gane Ahmati ka krijuar formën e saj të veçantë të të shkruarit, krijimit dhe të të shprehurit të gjërave e fenomeneve jetësore në artin e saj poetik.
Ajo përdor mjaft, madje nuk rresht së praktikuari, figura stilistike dhe trope, që e bëjnë poezinë e saj akoma më të pëlqyer nga lexuesi. Stilin e të shkruarit të saj të veçantë e vërejmë edhe gjatë ligjërimit, dhe atë në mënyrë të veçantë e shumë personale, sidomos kur shpreh brengën, e që aq shumë duket sikur vete deri tek skajet e fundme te anës së ndritshme të jetës – optimizmit, buzë pesimizmit.
Dhe kur duket që gjithç’ka e çdo gjë ka shkuar deri buzë greminës, poetja pikërisht aty ndalet dhe asgjë nuk hedh në të.
Pikërisht në atë skaj fillon një buzëqeshje të lehtë dhe pikërisht aty fillon të rikthehet tek ana e ndritshme e jetës, tek optimizmi, tek bukuria e saj që fillon të shikohet dhe të shijohet, tek kuptimi i thënies “… jeta megjithatë duhet dhe meriton të jetohet”. Të gjitha këto poetja Gane Ahmeti i paraqet, “zbukuron” e “stilizon” me artin e saj të veçantë dhe të bukur krijues.
Autorja, Gane Ahmeti, e cila premton vlera në artin e bukur të letërsisë shqipe, na vjen me librin e parë me poezi të titulluar, “RRUGËTIMI” – Botues: Lena GRAPHIC; Dizajni: Rrezart Fejzullahu; Redaktor & Lektor: Halil Xani.
