Botime të reja: – Një himn për jetën dhe njeriun e këtij nënqielli – Sherafedin Kadriu, “Kur vdesin ngjyrat”
Një himn për jetën dhe njeriun e këtij nënqielli – Sherafedin Kadriu, “Kur vdesin ngjyrat”, Editoi, Shtëpia Botuese “Beqir Musliu”, Gjilan, 2025)
Shkrimtari dhe njohësi i mirë i trashëgimisë kulturore, shpirtërore si dhe arkeologjike të Gjilanit me rrethinë, Sherafedin Kadriu, solli në dritë këto ditë përmbledhjen e tij të parë me poezi, KUR VDESIN NGJYRAT, edituar nga Shtëpia botuese “Beqir Musliu”.
Kjo përmbledhje, e vlerësuar si një himn poetik për jetën dhe njeriun e këtij nënqielli, ndërtohet përmes 12 cikleve ( një simbolikë kjo e mirëmenduar si dhe shoqërohet me NJË KALLËZIM JASHTËLETRAR si dhe me dy vlerësime për librin, duke krijuar kështu një tërësi unike të librit, i cili do t’jetë interesant jo vetëm për lexuesin por edhe për kritikën letrare.
PAK SHËNIME PËR AUTORIN e kësaj përmbledhje poetike
Sherafedin Kadriu u lind në Pogragjë të Gjilanit. Gjimnazin shkencor dhe Akademinë Pedagogjike (drejtimi gjuhë shqipe) i kreu në Gjilan, ndërsa me korrespodencë kreu Fakultetin Filologjik, drejtimi letërsi dhe gjuhë shqipe në Prishtinë.
Mësimdhënës i gjuhës shqipe në disa shkolla të Gjilanit, ndërsa në vitin 2004 pranohet ne QRTK Gjilan, bashkëpunëtor profesional për kulturë jomateriale. Ka përfunduar Masterin Shkencor për Arkeologji, specialiteti Prehistori, me ç’rast mori titullin arkeolog.
KA BOTUAR
• “Në kërkim të thellësive poetike” 1, libri i parë në fushën e kritikës letrare, sh. b. “Beqir Musliu”, 2021, Gjilan.
• “Në kërkim të thellësive poetike” 2, libri i dytë në fushën e kritikës letrare, sh. b.”Rozafa”, 2024, Prishtinë.
• “Rrugëtimi i një bashkatdhetari”, monografi, (bashkautor me Sabit Rrustemin), sh.b. “Beqir Musliu”, 2020, Gjilan
K u r v d e s i n n g j y r a t, është përmbledhja e parë poetike e këtij autori, e cila para pak ditësh doli nga shtypi përmes shtëpisë botuese “Beqir Musliu”, me të cilën poeti kësaj radhe dëshiron të komunikojë me lexuesin përmes poezisë.
