“Bllokimi i pjesshëm i disa rrugëve”, policia me njoftim lidhur me protestën e paralajmëruar për të enjten në Prishtinë

Drejtoria Rajonale e Policisë në Prishtinë ka njoftuar se të enjten, më 29 maj 2025, nga ora 10:00 deri në 12:00, do të mbahet një protestë e organizuar nga Oda Ekonomike e Kosovës (OEK), me pjesëmarrje të bizneseve të ndryshme nga vendi.

Sipas njoftimit, protesta do të zhvillohet në formë të një qëndrimi të qetë dhe përfshin bllokimin e pjesshëm të disa rrugëve kryesore hyrëse në kryeqytet, përmes vendosjes së automjeteve të rënda nga kompanitë pjesëmarrëse.

Pikat ku do të realizohet protesta janë:

Veterniku – hyrja për në qytet

Rrethi te Kazerma – drejtimi Fushë Kosovë – Prishtinë

Rrethi i Arbërisë – drejtimi Mitrovicë – Prishtinë

Vranjevci – Sharbanët – drejtimi Podujevë – Prishtinë

Policia e Kosovës do të jetë e pranishme në terren për të siguruar rendin dhe sigurinë publike, si dhe për të menaxhuar trafikun dhe riorientuar automjetet drejt rrugëve alternative.

Qytetarëve u kërkohet mirëkuptim për vonesat e mundshme dhe u sugjerohet të shmangin këto rrugë gjatë orarit të protestës.

Policia thekson se protesta është paralajmëruar brenda një afati të shkurtër dhe se është mbajtur një takim koordinues me organizatorët, gjatë të cilit janë rikujtuar obligimet ligjore dhe ndalimi i bllokimit total të rrugëve.

Qytetarët ftohen të respektojnë udhëzimet e zyrtarëve policorë dhe të kontribuojnë për një zhvillim të qetë të protestës dhe ruajtjen e rendit e sigurisë publike.