Biseda telefonike mes Putin dhe Macron.
Vladimir Putin i tha homologut të tij francez Emmanuel Macron se ai do të vazhdojë operacionet ushtarake në Ukrainë, gjatë një telefonate 90-minutëshe të iniciuar nga Putin, u tha gazetarëve një burim i Pallatit Élysée.
Burimi i Elysée tha se “më e keqja nuk ka ardhur ende” në Ukrainë pas telefonatës së Macron me Putinin.
Të njejtën gjë shprehu edhe Macron në konferenc ditën e djeshme.
Ndërkohë, agjencia shtetërore ruse e lajmeve TASS tha se Putin dhe Macron kishin “një shkëmbim të sinqertë pikëpamjesh mbi situatën rreth Ukrainës”.
Putini paralajmëroi Perëndimin se nëse negociatat ruso-ukrainase zvarriten, atëherë Moska do të ketë kërkesa të reja ndaj Kievit dhe se detyrat e “operacionit ushtarak special” do të kryhen.
Sipas burimit të Elysée, Putin gjithashtu mohoi të kishte bombarduar Kievin dhe paralajmëroi se situata do të përkeqësohet, por është faji i Ukrainës.
Në përgjigje, Macron e paralajmëroi Putinin se ai po bën një gabim të madh, sipas burimit. Macron përsëriti se kërkesat e Moskës për neutralizimin dhe çarmatimin e Ukrainës janë të papranueshme dhe përgjegjësia e këtij konflikti bie tërësisht mbi Putinin.
Por Macron tha gjithashtu se ka ende kohë për diplomaci dhe dialog për të adresuar shqetësimet dhe për të përfshirë interesat e Rusisë; megjithatë, diskutimi nuk mund të ndodhë “nën kontrollin rus” dhe duhej të organizohej nga partnerë ndërkombëtarë, sipas burimit.
Macron gjithashtu i kërkoi Putinit të respektojë presidentin ukrainas, familjen e tij, të afërmit, zyrtarët shtetërorë dhe përfaqësuesit e zgjedhur.
