Bie qeveria e Lituanisë, jep dorëheqjen kryeministri Paluckas

Kryeministri i Lituanisë, Gintautas Paluckas ka dhënë dorëheqjen nga posti i tij këtë të hënë, më 4 gusht, duke shkaktuar automatikisht edhe dorëheqjen e të gjithë kabinetit qeveritar.

Në mëngjes, Paluckas thirri një mbledhje të jashtëzakonshme tq qeverisë, ku konfirmoi vendimin:

“Pasi kam marrë vendimin për të dhënë dorëheqjen si kryeministër, shpall dorëheqjen e Qeverisë së 19-të të Lituanisë,” tha ai në fillim të mbledhjes, citon LRT.

“Mund të tingëllojë dramatike, por po largohem, ju do të vazhdoni punën në mënyrë të përkohshme, derisa kryeministri i ri të vendosë për ndryshimet që do të bëhen,” shtoi ai.

Paluckas tha se dorëheqja formale do t’i dorëzohej Presidentit Gitanas Nauseda më vonë gjatë ditës, ndërsa falënderoi ministrat për bashkëpunimin gjatë mandatit të tij:

“Ka qenë një nder i vërtetë. Qeveria e 19-të ka arritur shumë dhe mendoj se nuk kemi pse të turpërohemi. Ju faleminderit të gjithëve.”

Dorëheqja vjen pas disa raportimeve hetimore për aktivitetet e tij të mëparshme dhe aktuale në biznes, që çuan në nisjen e dy hetimeve paraprake nga autoritetet ligjzbatuese, duke rritur presionin ndaj tij.

Sipas kushtetutës së Lituanisë, dorëheqja e kryeministrit nënkupton edhe dorëheqjen e gjithë kabinetit. Presidenti duhet të njoftohet në të njëjtën ditë, ndërsa pritet të firmosë një dekret për pranimin e dorëheqjes dhe për të ngarkuar qeverinë me detyrat në mënyrë kujdestare deri në formimin e qeverisë së re.

Presidenti Nauseda ka deri në 15 ditë kohë për të propozuar një kandidat të ri për kryeministër në parlament (Seimas). Kandidatura do të vijë nga Partia Socialdemokrate, që ka grupin më të madh në parlament dhe pritet të vendosë për emrin e propozuar në një takim të kryesisë të mërkurën.

Pas miratimit në parlament, kryeministri i ri do të ketë 15 ditë për të paraqitur kabinetin dhe programin qeverisës, në koordinim me presidentin.

Formimi i qeverisë së re pritet të sjellë edhe rishikime të marrëveshjes aktuale të koalicionit trepalësh, ku Paluckas ishte emëruar si udhëheqës qeveritar. Koalicioni përfshin Partinë Socialdemokrate, partinë “Agimi i Nemunasit” (19 deputetë) dhe Demokratët “Për Lituaninë” (15 deputetë), me gjithsej 86 vende në parlamentin me 141 anëtarë. Demokratët kanë sinjalizuar se mund të kërkojnë ndryshime në përbërjen e koalicionit, duke përjashtuar ndoshta partinë “Agimi i Nemunasit”.

Pas bastisjes së apartamentit të vëllait të Paluckas nga policia javën e kaluar, kryeministri njoftoi dorëheqjen nga posti i kryeministrit dhe udhëheqësit të partisë.
Kryetari i bashkisë së Jonavës, Mindaugas Sinkevicius, ka marrë përkohësisht drejtimin e partisë dhe është një nga kandidatët potencialë për kryeministër. Kandidatë të tjerë të mundshëm përmenden ministrja e Punës dhe Sigurimeve Shoqërore Inga Ruginiene, nënkryetari i parë i Seimas-it, Juozas Olekas dhe kryetari i qarkut të Vilniusit, Robert Duchneviç.

Aktualisht, Partia Socialdemokrate ka 52 vende në Seimas.