Bideni paralajmeron Putinin se SHBA-ja është e gatshme për çfarëdo skenari, nëse Rusia vazhdon me planin e saj për pushtimin e Ukrainës.
Biseda telefonike mes presidentit të Shteteve të Bashkuara të Amerikës, Joe Biden, dhe atij rus, Vladimir Putin, ka përfunduar, ka njoftuar Shtëpia e Bardhë.
Biseda ka zgjatur një orë e dy minuta.
Diskutimet erdhën pasi SHBA-ja urdhëroi evakuimin e stafit të ambasadës në këtë shtet, me paralajmërimin se Rusia mund të nisë pushtimin në çdo moment.
Gjatë bisedës telefonike që kanë zhvilluar të shtunën, presidenti amerikan, Joe Biden, ka kërcënuar atë rus, Vladimir Putin, duke ia bërë të qartë se SHBA-ja është e gatshme për çfarëdo skenari, nëse Rusia vazhdon me planin e saj për pushtimin e Ukrainës.
Siç ka njoftuar Shtëpia e Bardhë, Bideni i ka thënë Putinit se pushtimi rus i Ukrainës do të sillte vuajtje e do të dobësonte pozitën e Rusisë. Bideni ia ka tërhequr vërejtjen Putinit se do të ketë çmim të rëndë për Rusinë nëse pushton Ukrainën.
Sipas njoftimit, Bideni “ia ka bërë të qartë Putinit se përderisa SHBA-ja është e fokusuar për t’u angazhuar në diplomaci me aleatët dhe partnerët e saj, është po aq e përgatitur edhe për skenarë të tjerë”.
Në njoftim theksohet se Bideni ka kërkuar nga Putini që të angazhohet në diplomaci e shtensionim të situatës.
