Betohen 311 rekrutë, Mehaj: Në vena keni ADN-në e Adem Jasharit
Janë betuar 311 rekrutë të rinj për shërbim në Forcën e Sigurisë së Kosovës.
Ministri i Mbrojtjes, Armend Mehaj, u është drejtuar ushtarëve të rinj duke u thënë se qëllim e kanë garantimin e paqes në vend dhe më gjerë.
Ai ka njoftuar se më 28 nëntor do të hapet konkursi i radhës për pranimin e mbi 600 ushtarëve të rinj.
“Jeni grupi më i madh që jeni certifikuar ndonjëherë në ushtrinë tonë. Me 311 ushtarë të rinj në total arrijnë 1230 ushtarë brenda 19 muajve punë. Sot ju njoftoj se me konkursin e ri të ardhës për pranimin e mbi 600 ushtarëve të rinj do ta hapim më 28 nëntor. Kjo është e nevojshme, kjo është e domosdoshme për të zhvilluar më tutje ushtrinë tonë dhe forcuar kapacitetet tona për mbrojtje të vendit”.
LEXO EDHE:
Mehaj ka theksuar se nuk mund të ecet përpara pa nderuar të kaluarën për të cilën është derdhu gjak.
“Në venat tuaja keni ADN-në e UÇK-së, keni ADN-nën e komandantit legjendar Adem Jasharit. Ushtria e Adem Jasharit nuk kthehet prapa, është e pathyeshme dhe e pamposhtur. Jemi të qëndrueshëm dhe vizionarë si Adem Demaçi dhe trima si Adem Jashari”.
Ndërsa, anëtarësimin në NATO e quajti synim parësor.
Koordinimi me SHBA dhe NATO-n është jetësor. Anëtarësimi në NATO dhe mekanizma të tjerë ndërkombëtare është synimi jonë i përbashkët. Do t’i përmbushim çdo detyrë dhe obligim që të jemi pjesë e familjes së madhe”.
