Bashkësia Islame shtroi iftar në Bujanoc
Kryesia e Bashkësisë Islame të Kosovës, shtroi të enjten iftarin tradicional në Bujanoc për imamët dhe besimtarët e asaj pjese.
Kryeimami i Kosovës, Vedat ef. Sahiti së bashku me drejtorin për Shtyp dhe Veprimtari Botuese, Ramadan Shkodrën dhe Abedin Sadriun morën pjesë në këtë iftar të përbashkët. Në këtë iftar, përveç imamëve të Bujanocit dhe këshilltarëve të xhamive, gjithashtu morën pjesë edhe kryetari i Komunës së Bujanocit, z. Nagip Arifi, Këshilli i BI-së së Gjilanit e të Kamenicës, intelektualë, drejtues të bizneseve, përfaqësues nga diaspora etj.
Kryimami Sahiti, fillimisht u prit nga kryetari i Këshillit të Bashkësisë Islame në Bujanoc, Sylejman ef. Fejzullahu, me ç ‘rast kryeimami Sahiti u informua për angazhimet e Keshillit dhe aktivitetet e Ramazanit në vecanti, si dhe mbi mbarëvajtjen e jetës fetare në Bujanoc.
Kryeimami, Vedat ef. Sahiti përcolli përshëndetjet e Myftiut Naim ef. Tërnava, duke theksuar se Bashkësia Islame do të jetë aktivisht mbështetëse e organizimit fetar Islam në Luginë, pavarësisht sfidave e veshtiresive me të cilat ballafaqohen besimtarët tanë në Bujanoc.
Pas iftarit, kryeimami Sahiti mbajti një ligjëratë mbi vleren e Natës së Kadrit në Xhaminë e Vjetër në Ternoc të Madh për t’i prirë më pas namazit të jacisë dhe teravive.
