Athinë: Rrahje masive mes tifozëve të Dinamo Zagreb e AEK-ut – vritet një person!
Në Greqi ndeshja mes AEK-ut të Athinës dhe Dinamos së Zagrebit ka humbur përmasat e një ndeshjeje futbolli pasi një i ri ka humbur jetën në një përleshje mes dy tifogrupeve.
Policia greke raportoi se ulrasit e Dinamo Zagreb kanë vrarë me thikë një tifoz grek, i cili i përkiste ultrasve të AEK-ut. Nga përleshjet mes dy tifo-grupeve, kanë mbetur të plagosur edhe 6 tifozë të tjerë të cilët janë transportuar menjëherë për në spital dhe aktualisht raportohet se janë jashtë rrezikut për jetën.
Ndërkohë, tifozi që ka mbetur i vrarë, ka marrë plagë të rënda dhe pavarësisht ndihmës mjekësore që mori në një spital të Athinës nuk arriti që të mbijetonte.
Sa i përket takimit UEFA pak minuta më parë mori vendimin për të shtyrë në një datë të papërcaktuar eventin, i cili ishte programuar të luhej sot në orën 20:45 në stadiumin “OPAP Arena” të Athinës.
