Arrestohet një tjetër person i dyshuar për sulmin ndaj gazetarëve në veri
Edhe një tjetër person është arrestuar sot për sulm ndaj gazetarëve në veri.
Telegrafi mëson se Policia e Kosovës ka arritur të arrestoi personin i cili dyshohet se sulmoi të premten në Leposaviq, kameramanin e RTK-së, Bardh Bekteshi.
Asociacioni i Gazetarëve të Kosovës (AGK), kishte njoftuar se kameramani kishte pësuar lëndime të rënda në kokë dhe trup.
“Sulmohen mediat në Leposaviq, kameramani i RTK-së, Bardh Bekteshi, pëson lëndime të rënda në kokë dhe trup. Ekipet mediale nga Prishtina kanë qenë sot cak i një sulmi brutal derisa po kryenin punën e tyre në Leposaviq. Kameramani i RTK-së, Bardh Bekteshi, është sulmuar fizikisht siç shihet në videon shqetësuese të dërguar në Asociacionin e Gazetarëve të Kosovës, nga ekipet në terren”, thuhej në njoftimin e AGK-së.
Të premten e 16 qershorit nga sulmet në veri u lënduan nëntë gazetarë. Policia njoftoi se disa prej tyre përveç shqetësimeve kanë pësuar edhe lëndime të ndryshme trupore, si dhe kanë pranuar tretman mjekësor.
