Arabia Saudite pezullon bisedimet e normalizimit me Izraelin
Arabia Saudite ka pezulluar bisedimet për normalizimin e mundshëm të marrëdhënieve me Izraelin, në mes të luftës që ka shpërthyer midis Izraelit dhe grupit militant palestinez Hamas, shkruan The Guardian.
Hamasi nisi një sulm në shkallë të gjerë mbi Izraelin më 7 tetor që vrau më shumë se 1300 njerëz, shumica prej tyre civilë, duke shkaktuar një përgjigje të ashpër izraelite që vrau afro 2 mijë njerëz në Gaza.
“Arabia Saudite ka vendosur të ndalojë diskutimin për normalizimin e mundshëm të marrëdhënieve dhe ka informuar zyrtarët amerikanë”, ka thënë një burim për AFP-në.
Raporti vjen ndërsa Sekretari i Shtetit i SHBA-së, Antony Blinken, po viziton Riadin në turneun diplomatik në Lindjen e Mesme.
Arabia Saudite dhe Izraeli pak para sulmit të Hamasit ishin afër nënshkrimin të marrëveshjes për normalizim, me ndihmën e SHBA-së. Por tani, sauditët kanë shprehur shqetësimin në rritje për fatin e palestinezëve në Rripin e Gazës.
