Ambasadorja Budima i dorëzoi kredencialet Presidentit të Republikës së Hungarisë
Me datë 17 shkurt 2022, Shkelqësia e Saj znj. Gjeneza Budima dorëzoi Letrat Kredenciale të akreditimit si Ambasadore e Jashtëzakonshme dhe Fuqiplotë e Republikës së Kosovës në Hungari, tek Shkelqësia e Tij z. Janos Ader, President i Republikës së Hungarisë.
Ceremonia formale u zhvillua në ambientet e Pallatit Presidencial Sandor në Budapest. Gjatë ceremonisë, ambasadorja Budima ia përcolli Presidentit Ader mesazhet mirënjohëse dhe falënderimin e Presidentes Osmani-Sadriu për mbështetjen dhe përkrahjen e vazhdueshme të Hungarisë dhënë Kosovës dhe populli të saj.
Ajo e njoftoi Presidentin Ader se po sot Kosova feston ditën e pavarësisë dhe për këtë është e lumtur që edhe personalisht mund t’ja përcjellë falënderimin e Presidentes Osmani-Sadriu dhe të të gjithë popullit të Kosovës për miqësinë, solidaritetin, ndihmën dhe partneritetin e Hungarisë dhe popullit hungarezë.
Pas takimit personal me Presidentin, Ambasadorja dhe delegacioni u shoqëruan nga Protokolli i Shtetit për në Sheshin e Heronjve ku u mbajt ceremonia e vendosjes së kurorës tek Monumenti i Heronjëve.Ambasadorja gjatë ceremonisë zyrtare shoqërohej nga bashkëshorti i saj si dhe diplomatët në Ambasadës e Republikës së Kosovës në Budapest, z. Naser Idrizi dhe z. Albert Kuqi.Ambasadorja Gjeneza Budima është ambasadorja e pestë me radhë e Republikës së Kosovës në Hungari, që nga hapja e Ambasadës në mars të vitit 2010.
