Alioski i siguron Maqedonisë një pikë të vlefshme ndaj Belgjikës
Përfaqësuesja e futbollit të Maqedonisë së Veriut ka barazuar 1:1 ndaj Belgjikës në kuadër të eliminatoreve për Kampionatin Botëror 2026.
Megjithëse skuadra e drejtuar nga trajneri Bllagoja Milevski ishte pranë kalimit në epërsi në disa raste, ishin belgët ata që shënuan të parët. Në minutën e 28-të, De Kjuper realizoi një gol për mysafirët, duke e çuar Belgjikën në avantazh.
Pas golit të pësuar, vendasit rritën presionin në kërkim të barazimit. Përpjekjet e tyre u shpërblyen në minutën e 87-të, kur Darko Çurlinov asistoi për Ezgjan Alioskin, i cili me një goditje të bukur volej barazoi rezultatin në 1:1.
Deri në fund të ndeshjes nuk pati ndryshim rezultati, me Maqedoninë e Veriut që administroi me maturi minutat e mbetura dhe siguroi një pikë të rëndësishme në këtë duel.
Ndeshjen e radhës, Maqedonia e Veriut do ta zhvillojë të hënën kundër Kazakistanit.
