Aleanca për Shqiptarët përkrah kushtet e Kurtit për Asociacionin

Aleanca për Shqiptarët ka dalë në përkrahje të kryeministrit Kurti lidhur me gjashtë kushtet për themelimin e Asociacionit të paraqitura të enjten në Kuvend.

Në një njoftim në Facebook, kjo aleancë ka vlerësuar se Asociacioni i komunave me shumicë serbe nuk duhet të jetë njëetnik dhe duhet të jetë në përputhje me Kushtetutën e Kosovës dhe vendimin e vitit 2015 të saj, përcjell arbresh.info.

“Aleanca për Shqiptarët përkrah pa rezervë kushtet e paraqitura publikisht nga Kryeministri i Republikës së Kosovës, Albin Kurti, në kuadër të dialogut Kosovë-Serbi të ndërmjetësuar nga Bashkimi Evropian dhe përkrahur nga SHBA-të.

Vlerësojmë se asociacioni i komunave me shumicë serbe nuk mund të jetë njëetnik dhe se ai duhet të jetë në përputhje të plotë me rendin juridik-kushtetues të Republikës së Kosovës dhe me vendimin e Gjykatës Kushtetuese të 23 dhjetorit 2015.”, thuhet në njoftimin e Aleancës për Shqiptarët.

Tutje, kjo aleancë ka theksuar se pakicat në Kosovë i gëzojnë të gjitha të drejtat, ashtu sic nuk i gëzon asnjë pakicë në vendet e rajonit dhe tha se zgjidhjet që do të bazoheshin në kërkesat shoviniste të Serbisë, krijojnë precedent të rrezikshëm për stabilitetin në rajon.

Më tej, ata kërkuan mobilizim nga ndërkombëtarët, në mënyrë që të arrihet një marrëveshje e ligjshme dhe me njohje reciproke mes Kosovës dhe Serbisë.

“Pakicat në Republikën e Kosovës gëzojnë të drejta të garantuara sipas standardeve më të larta evropiane, me mekanizma mbrojtëse më të sofistikuara se në çdo vend tjetër të rajonit. Çdo zgjidhje që do bazohej në kërkesat shoviniste të Beogradit, do të krijonte precedent të rrezikshëm për stabilitetin rajonal duke rritur apetitet e qarqeve të ndryshme nacionaliste, në një kohë të brishtë për Ballkanin Perëndimor, kur tërë kapitali politik i shumicës së vendeve të rajonit është i fokusuar në shkëputjen nga Rusia dhe ridinamizimin e zgjerimit të BE-së.

Kërkojmë mobilizim të shtuar nga partnerët ndërkombëtarë për arritjen e një marrëveshje ligjërisht të detyrueshme, me njohjen e ndërsjellë në qendër dhe sipas afateve të planit evropian për normalizimin e marrëdhënieve midis Kosovës dhe Serbisë.”, thuhet në njoftimin e tyre.