Aksion simbolik para stacionit policor në Bujanoc
Me një aksion simbolik, Këshilli Nacional i Shqiptarëve në Luginë me seli në Bujanoc, ka protestuar në mënyrë paqësore para dyerve të Stacionit Policor në këtë qytet, për të kërkuar punësim proporcional të shqiptarëve në këtë institucion, konform me numrin e banorëve, sipas ligjeve në fuqi, thuhet në një njoftim public në faqen e kreut të këtij institucioni, Nevzad Lutfiu.
“”Respektojeni kushtetutën”, ishte thirrja që i bëmë sot Ministrisë së Brendshme të Serbisë. Neni 77 i Kushtetutës së Republikës së Serbisë thotë: “Lidhur me punësimin në organet shtetërore, në ndërmarrjet publike, organet e krahinës, vetëqeverisjes lokale duhet të kihet parasysh përbërja nacionale dhe përfaqësimi proporcional i pakicave nacionale”.”, shkruan Lutfiu, në faqen e tij në facebook.
“Numri i policëve shqiptarë është tejet i vogël, madje shumë prej tyre janë afër pensionit. As edhe një polic i pranuar në vitet e fundit nga komuniteti shqiptar”, vijon ai me shkrimin, duke i bërë thirrje Bashkësisë Ndërkombëtare që ta kenë vëmendjen tek gjendja e shqiptarëve në Serbi, pasi sipas tij, diskriminimini ka prekur kufinjtë e racizmit.
