Abdixhiku për pozicionin e VV-së: Është gabim trashanik për nivelin dijes politike që do të duhej ta kishte Kurti
Kryetari i Lidhjes Demokratike të Kosovës, Lumir Abdixhiku, ka thënë se kryetari i Vetëvendosjes, Albin Kurti, është i padijshëm politikisht.
Lideri i LDK-së ka thënë në emisionin Debat Plus në RTV Dukagjini, se Kurti nuk po e kupton që nuk e ka shumicën.
“Kemi një diskrepancë të thellë të vetë demokracisë. Është naivitet i madh që të konsiderosh që je në pozitë e të tjerët në opozitë, po i bie që ai nuk e njeh rezultatin e zgjedhjeve të këtij viti, por vazhdon të mendoi që është kryeministër ende bazuar në zgjedhjet e kaluara. Nuk mund të sillet më me 51%. S’ka legjitimitet”, ka thënë Abdixhiku.
“Ai s’po e kupton që duhet të bëjë marrëveshje për të pasur shumicë”, ka thënë kreu i LDK-së.
Abdixhiku ka thënë se Kosova aktualisht është në krizë.
“Unë besoj që jemi në krizë. Jemi mbledhur 34 herë në Kuvend dhe ende s’ka marrëveshje”, ka thënë ai./I
