A ka folur Kurti me Limajn për koalicionin, Kryeministri: Është bërë luftë hibride kundër nesh
Kryeministri Albin Kurti e ka komentuar sot për herë të parë vetëofrimin e liderit të NISMA’s Socialdemokrate, Fatmir Limaj për ta ndihmuar në krijimin e Qeverisë së re.
Kurti nga Gjilani tha se fillimisht po presin certifikimin e rezultateve, shkruan Gazeta Online Reporteri.net.
I pyetur nëse do të ketë një koalicion me partinë e Fatmir Limajt, NISMA, ai tha që s’ka qëndrime të tjera lidhur me opozitën.
Kurti tha se njëherë po presin certifikimin e rezultateve dhe pastaj do të shohin për rrugën përpara.
Ai tha VV është fituese e zgjedhjeve dhe ata duhet ta bëjnë qeverinë e re.
“Së pari ne presim certifikimi ne rezultateve dhe më pastaj do të shikojmë për rrugën përpara. S’ka ndryshuar situata që të kemi qendrime të tjera sa i përket kundërshtarëve tanë. Është bërë luftë hibride kundër qeverisë tonë por kemi dalë fitimitar, dhe ai duhet ta formojë qeverinë”, tha Kurti para gazetarëve.
Kurti, nuk u paraqit të martën në Prokurorinë e Speciale, përkundër urdhrit të gjykatës që të paraqitej në orën 10:00 për të dëshmuar në rastin e Rezervave Shtetëore.
Gjykata Themelore në Prishtinë konfirmoi javën e kaluar se me kërkesë të Prokurorisë së Posaçme kishte lëshuar një urdhër që e detyronte kryeministrin Kurti, të paraqitej për të dëshmuar në një rast që lidhet me ‘rezervat shtetërore’, pas refuzimit të dy thirrjeve nga ana e tij në dhjetor të vitit të kaluar.
Javën e kaluar zyra e kryeministrit Kurti njoftoi se ka kërkuar nga Gjykata Themelore në Prishtinë që ta detyrojë Prokurorinë e Posaçme të marrë dëshminë e kryeministrit të Kosovës Albin Kurti, brenda zyrës së tij në qeveri.
Gjykata tha se me datën 28 shkurt, përmes emalit ka marrë përgjigjen e Zyrës së Kryeministrit në të cilën thuhet se zoti Kurti ka qenë dhe mbetet i gatshëm të japë dëshminë e tij dhe se “kërkesa e tij që kjo të ndodhë në mjediset e Zyrës së Kryeministrit është plotësisht e arsyeshme dhe nuk mund të interpretohet si shmangie nga drejtësia.
Kryeministri Kurti tha sot se asnjëherë nuk ka refuzuar të jap dëshmi ndërsa ritheksoi kërkesën e tij që kjo të ndodhë në ndërtesën e qeverisë.
“Kam shkruar letër ku kam treguar edhe oraret kur mund të jap dëshminë. Mirëpres Prokurorinë e Shtetit në zyrën e kryeministrit. Nuk ka ndonjë arsye që të mos vazhdojë procesi. Pra, qysh në muajin dhjetor ka qenë e mundur që të kryhet ky intervistimi dhe të jepet dëshmia nga ana ime”, tha ai gjatë një veprimtarie në Gjilan, e cila u zhvillua pikërisht në kohën kur duhej të paraqitej në prokurori.
“Nëse Prokuroria e ka pasur shumë të rëndësishme dëshminë time, ajo do të vinte te ne. Një prokuror që ka synim dëshminë e një dëshmitari, ajo nuk humb kohë. Shtrohet pyetja pse i humbi Prokuroria 3 muaj. Për bindjen time është më e interesuar të mbushë ballinat e ndonjë portali të oligarku sesa të sjellë drejtësi. Kurrë Prokuroria e Shtetit në Kosovë s’ka qenë më e lire por lirinë po e përdor e keqpërdor për të luftuar qeverinë dhe jo krimin e korrupsionin”, tha kryeministri Kurti.
