Arrestohet një shtetas gjerman në rajonin e Gjilanit, sekuestrohen 43 armë automatike
Një shtetas gjerman është arrestuar në rajonin e Gjilanit, pasi në automjetin me të cilin po udhëtonte janë zbuluar 43 armë të gjata automatike. I dyshuari po hetohet për përfshirje të dyshuar në krim të organizuar dhe trafikim të kundërligjshëm të armëve.
Policia e Kosovës, në bashkëpunim me Prokurorinë Speciale të Republikës së Kosovës (PSRK), ka arrestuar një shtetas gjerman me inicialet L.S., nën dyshimin për përfshirje në veprimtari kriminale që lidhen me krimin e organizuar dhe trafikimin e kundërligjshëm të armëve.
Sipas komunikatës së përbashkët të Policisë dhe Prokurorisë Speciale, arrestimi është realizuar pas hetimeve të përbashkëta nga hetuesit e Drejtorisë për Hetimin e Krimit të Organizuar dhe Krimeve të Rënda.
I dyshuari fillimisht është ndaluar në rajonin e Gjilanit, ndërsa automjeti me të cilin po udhëtonte është dërguar për kontroll dhe skanim të mëtejshëm. Gjatë kontrollit janë zbuluar dhe sekuestruar 43 armë të gjata automatike.
Me urdhër të Prokurorisë Speciale, ndaj të dyshuarit është caktuar masa e ndalimit prej 48 orësh. Ai dyshohet për veprat penale të pjesëmarrjes ose organizimit të grupit kriminal të organizuar, si dhe të importit, eksportit, furnizimit, transportimit, prodhimit, këmbimit, ndërmjetësimit ose shitjes së paautorizuar të armëve apo materieve plasëse.
Ndërkohë, Prokuroria Speciale, në koordinim me Policinë e Kosovës, është duke ndërmarrë veprimet e nevojshme hetimore për zbardhjen e plotë të rastit, përfshirë verifikimin e origjinës dhe destinacionit të armëve të sekuestruara.
Policia e Kosovës dhe Prokuroria Speciale kanë bërë të ditur se do ta informojnë publikun për zhvillimet e mëtejshme, në përputhje me legjislacionin në fuqi dhe pa cenuar integritetin e hetimit.
