UKZ mbajti takimin fillestar për themelimin e Programit të përbashkët Master me Universitetin Sapienza të Romës
Në Universitetin Publik “Kadri Zeka” në Gjilan u mbajt takimi fillestar për nisjen e Projektit SHER JDD – Faza II, i cili synon themelimin e programit të përbashkët ndërkombëtar: “Master i Shkencave në Paqen Globale – Hartimi i Politikave për Diversitet, Pluralizëm dhe Barazi në një Botë Polikrize”, në bashkëpunim me Universitetin Sapienza të Romës. Projekti realizohet në kuadër të programit SHER, i financuar nga Bashkëpunimi Austriak për Zhvillim.
Në takim morën pjesë përfaqësues të institucioneve partnere, akademikë, studentë dhe përfaqësues të programit SHER, me qëllim prezantimin e objektivave dhe aktiviteteve të fazës së dytë të projektit.
Koordinatori i projektit, Prof. Dr. Dukagjin Leka, theksoi rëndësinë e bashkëpunimit ndërkombëtar dhe të programit të ri master, i cili do të trajtojë tema si paqja globale, diversiteti, pluralizmi, barazia gjinore dhe sfidat sociale bashkëkohore. Ai nënvizoi se projekti përfaqëson një hap të rëndësishëm drejt ndërkombëtarizimit të studimeve në UKZ dhe forcimit të partneritetit me universitetet evropiane.
Përmes lidhjes online, përfaqësues të Universitetit Sapienza të Romës, WUS Austria dhe programit SHER përshëndetën pjesëmarrësit, duke vlerësuar progresin e deritanishëm dhe rëndësinë e programit për studentët dhe stafin akademik.
Përfaqësuesi i SHER në Kosovë, Nehat Dervishi, theksoi rolin e programit në avancimin e cilësisë së arsimit dhe kërkimit shkencor, ndërsa Dekani i Fakultetit të Shkencave Sociale, Prof. Asoc. Dr. Selim Daku, vlerësoi rëndësinë e programit për zhvillimin e studimeve në fushat e paqes, politikave publike, diversitetit dhe barazisë.
Sipas Prof. Lekës, programi do të jetë dyvjeçar dhe do të zhvillohet në bashkëpunim të ngushtë me partnerët ndërkombëtarë, duke synuar përmbushjen e standardeve evropiane të cilësisë dhe zgjerimin e partneriteteve drejt programeve të përbashkëta Erasmus Mundus.
Në kuadër të aktivitetit u ndanë certifikata mirënjohjeje për donatorët dhe partnerët që mbështetën vizitën studimore të studentëve të UKZ-së në Parlamentin Evropian dhe Këshillin e Evropës në Strasburg. Studentët pjesëmarrës ndanë përvojat dhe përfitimet e fituara nga kjo vizitë, ndërsa donatorët shprehën kënaqësinë për mbështetjen e kësaj iniciative.
