Ademi sqaron vonesat në rrugën drejt Velekincës: Ndërhyrje në ujësjellës, punimet vazhdojnë së shpejti
Asambleisti i Kuvendit Komunal të Gjilanit nga radhët e LVV-së, Fadil Ademi, ka reaguar pas shqetësimeve të qytetarëve lidhur me vonesat në punimet e rrugës nga ETC deri në Velekincë.
“Përmes një sqarimi publik, Ademi ka bërë të ditur se vonesat kanë ardhur si pasojë e një ndërhyrjeje të domosdoshme në rrjetin e ujësjellësit, konkretisht zëvendësimit të gypit kryesor nga kompania ‘Hidromorava’.”
Sipas tij, ky investim synon përmirësimin e furnizimit me ujë të pijshëm dhe parandalimin e problemeve afatgjata në këtë zonë.
Ai ka bërë të ditur se punimet për ndërrimin e gypit kryesor do të zhvillohen në segmentin nga rrethi te ish-zyra e kryetarit deri në Lagjen Arbëri, përkatësisht te furra “Qoqaj”.
Ademi ka theksuar se ky intervenim është pjesë e projektit “FLOWS”, një investim rreth 15 milionë euro që synon modernizimin e rrjetit të ujësjellësit në Gjilan.
Pas përfundimit të këtyre punimeve, sipas tij, do të vazhdohet menjëherë me rregullimin e rrugës në këtë segment.
Në fund, ai ka kërkuar mirëkuptim nga qytetarët, duke premtuar përfundimin e punimeve sa më shpejt dhe me cilësi.
