Prishtinë – Gjilan: Fillojnë punimet për rrethrrotullimin te “Gorenje” në dalje të Prishtinës drejt Gjilanit
Një nga nyjet më të ngarkuara të trafikut në Prishtinë po merr më në fund një zgjidhje infrastrukturore.
Kryetari i Prishtinës, Përparim Rama, ka njoftuar se kanë filluar punimet për ndërtimin e rrethrrotullimit te Gorenja, projekt që synon të lehtësojë qarkullimin në një nga daljet kryesore të kryeqytetit.
Sipas Ramës, kjo ndërhyrje do ta funksionalizojë daljen nga Prishtina në drejtim të Gjilanit, duke përmirësuar ndjeshëm qarkullimin e automjeteve dhe duke reduktuar kolonat e gjata që krijohen shpesh në këtë segment.
Rrethrrotullimi i ri do të lidhë më mirë disa nga rrugët kryesore të zonës, përfshirë rrugën “Nekibe Kelmendi”, “Richard Holbrooke” dhe “Xhevat Qena”. Ky projekt pritet të ndikojë drejtpërdrejt në përmirësimin e lëvizjes së qytetarëve dhe në rritjen e sigurisë në trafik.
Autoritetet komunale kanë theksuar se kjo është një ndër ndërhyrjet e rëndësishme infrastrukturore për të zgjidhur një problem të kahershëm të trafikut në këtë pjesë të kryeqytetit.
