Profesori gjilanas Nevzad Isufi nderohet ng MASHTI me çmimin “Shaban Jashari”, konfirmon për TV Gjilani edhe vlerësimin që do të marrë nga Komuna
Profesori nga Gjilan, Nevzad Isufi, është ndër mësimdhënësit e vlerësuar në ceremoninë shtetërore të organizuar për Dita e Mësuesit nga Ministria e Arsimit, Shkencës, Teknologjisë dhe Inovacionit, ku u ndanë çmimet dhe mirënjohjet për arsimtarët më të dalluar nga të gjitha komunat e Kosovës.
Në këtë ceremoni u nda edhe çmimi kryesor në arsim, “Çmimi Shaban Jashari”, i cili këtë vit iu dha mësueses Arta Gashi, ndërsa në mesin e mësimdhënësve të vlerësuar si përfaqësues të komunave ishte edhe profesori gjilanas Nevzad Isufi.
Isufi ka rreth 29 vite përvojë të pandërprerë në procesin edukativo-arsimor, duke filluar nga viti 1993, ndërsa gjatë karrierës së tij ka kontribuar në edukimin dhe formimin e shumë gjeneratave të nxënësve në arsim. Ai i përket gjeneratës së mësimdhënësve që gjatë viteve ’90 punuan në rrethana të vështira për arsimin shqip, duke qenë pjesë e përpjekjeve për ta mbajtur gjallë procesin mësimor në atë periudhë.
Përveç angazhimit në procesin mësimor, profesori Isufi është dalluar edhe me aktivitete të shumta jashtëkurrikulare, organizime kulturore dhe edukative për nxënësit, si dhe pjesëmarrje aktive në zhvillimin institucional të shkollës dhe në procese profesionale që lidhen me përmirësimin e sistemit arsimor.
Ndërkohë, vetë profesori Nevzad Isufi ka konfirmuar për TV Gjilani se të hënën do të marrë edhe një vlerësim tjetër nga Komuna e Gjilanit, ku do të nderohet si punëtor i dalluar i arsimit. Sipas tij, pikërisht kjo komunë e kishte nominuar më herët në nivel vendi për çmimin prestigjioz “Çmimi Shaban Jashari”.
Ky vlerësim konsiderohet një moment i rëndësishëm edhe për arsimin në Gjilan, pasi një nga profesorët e kësaj komune është përfshirë në mesin e mësimdhënësve të nderuar në nivel të Kosovës për kontributin e tij shumëvjeçar në arsim.
