Drejtori i Zhvillimit Ekonomik viziton fabrikën e re të biçikletave në Ponesh
Drejtori i Zhvillimit Ekonomik në Komuna e Gjilanit, Haki Huruglica, ka vizituar fabrikën e re për prodhimin e biçikletave “Albimi”, e cila është në ndërtim e sipër në fshatin Ponesh të Gjilanit.
Gjatë vizitës, ai është pritur nga pronari i kompanisë, Ibrahim Krivaqa, i cili ka prezantuar ecurinë e punimeve dhe planin për funksionalizimin e fabrikës. Sipas tij, kapaciteti prodhues parashihet të arrijë deri në 130 mijë biçikleta në vit, duke përfshirë modele standarde dhe elektrike, me fokus kryesor eksportin në tregun evropian.
Sipas të dhënave të prezantuara nga kompania, prodhimi do të realizohet në përputhje me standardet evropiane të cilësisë dhe sigurisë. Produktet janë të certifikuara nga SGS, ndërsa kompania zbaton edhe standardet e BSCI, që lidhen me kushtet e punës dhe përgjegjësinë sociale në zinxhirin e furnizimit.
Nga Drejtoria për Zhvillim Ekonomik është bërë e ditur se gjatë vizitës janë parë nga afër instalimet e teknologjisë dhe përgatitjet për nisjen e procesit të prodhimit. Sipas deklarimeve, me vënien në funksion të fabrikës pritet të hapen dhjetëra vende të reja pune.
Drejtori Huruglica është shprehur se investime të tilla ndikojnë në rritjen e prodhimit vendor dhe në zgjerimin e eksporteve, duke e konsideruar sektorin prodhues si një nga shtyllat kryesore të zhvillimit ekonomik lokal.
Projekti i fabrikës në Ponesh pritet të kontribuojë në rritjen e aktivitetit industrial në zonën e Gjilanit, ndërsa mbetet të shihet dinamika e plotë e operimit dhe ndikimi konkret në tregun e punës pas fillimit të prodhimit.
