Një jetë në shërbim të dijes – Shaban Hasan Rexhepi pensionohet në 65-vjetorin e lindjes
Pas një angazhimi të gjatë dhe të palodhshëm në arsim dhe kulturë, sot është pensionuar Shaban Hasan Rexhepi, pikërisht në ditën kur mbush 65 vjet.
Me dekada të tëra pune si mësimdhënës dhe më pas si bibliotekist në Gjilan, ai mbyll një kapitull të rëndësishëm jetësor, duke lënë pas një kontribut të çmuar në edukimin e brezave dhe në promovimin e librit e dijes.
BIOGRAFIA
Shaban Hasan Rexhepi u lind më 1 mars 1961 në fshatin Priboc, komuna e Bujanocit.
Shkollën fillore e nisi në vitin 1968 dhe e përfundoi në vitin 1976. Pesë klasat e para i kreu në shkollën e Pribocit, paralele të ndara fizike të shkollës amë “Skënderbeu” në Zarbicë, ndërsa tri vitet e tjera të fillores i përfundoi në Zarbicë.
Shkollën e mesme, Akademinë Pedagogjike “Skënderbeu” – Grupi Klasor, e filloi në vitin 1976 në Gjilan, për ta vazhduar më pas në Gjimnazin “Zenel Hajdini”, të cilin e përfundoi në vitin 1980.
Më pas vazhdoi studimet në Shkollën e Lartë Pedagogjike “Skënderbeu” – Grupi Klasor, po në Gjilan.
Pas përfundimit të Shkollës së Lartë, për herë të parë filloi punën si mësimdhënës në vitin 1985, në shkollën fillore të fshatit Novosellë, paralele të ndara fizike të shkollës amë në Zarbicë.
Gjatë viteve 1987–1988 dhe 1992 punoi si mësimdhënës i mësimit lëndor në fshatin e tij të lindjes, Priboc, si dhe në shkollën amë në Zarbicë, ndërsa nga viti 1992 deri në vitin 1999 punoi në shkollën fillore në Qarr, paralele të ndara fizike të shkollës amë “Migjeni” në Muhoc.
Në vitin 1999, pas vendosjes së forcave policore-ushtarake serbe në fshatrat e Malësisë së Bujanocit dhe maltretimeve e dhunës së ushtruar mbi popullatën shqiptare, si shumica e banorëve të kësaj treve, edhe Shabani, së bashku me familjen, u detyrua të largohej nga vendlindja dhe të vendosej në Gjilan, me shpresën se një ditë do të kthehej përsëri. Mirëpo, kjo deri më tani ka mbetur vetëm një dëshirë dhe shpresë për të ardhmen.
Në Gjilan pati fatin të punësohej në Bibliotekën e Qytetit “Fan S. Noli”, ku punoi deri në pensionim.
Punën në bibliotekë e kreu me nder, përkushtim dhe seriozitet. Për angazhimin dhe punën e palodhshme u nderua me mirënjohje nga biblioteka. Po ashtu, në vitin 2012 u shpall punëtori më i mirë i bibliotekës dhe u nderua me mirënjohje nga Komuna e Gjilanit.
Tani jeton në Gjilan, duke përmbyllur një rrugëtim të gjatë profesional në shërbim të arsimit dhe kulturës.
Me rastin e pensionimit, kolegët, miqtë dhe të gjithë ata që patën fatin të bashkëpunojnë me të, e falënderojnë për përkushtimin, ndershmërinë dhe profesionalizmin e treguar ndër vite. Z. Shaban Hasan Rexhepit i urojmë shëndet të plotë, jetë të gjatë dhe një pensionim të qetë e të lumtur, të mbushur me gëzim pranë familjes dhe më të dashurve të tij.
