Takim mes Komunës së Kamenicës dhe Agjencisë Kadastrale të Kosovës për projektet kadastrale
Në Komunën e Kamenicës është mbajtur një takim ndërmjet kryetarit të komunës, Kadri Rahimaj, dhe drejtorit të Agjencia Kadastrale e Kosovës, Avni Ahmeti, ku u diskutua për projektet aktuale që lidhen me rindërtimin dhe përditësimin e të dhënave kadastrale në këtë komunë, shkruan TV Gjilani.
Në takim morën pjesë edhe nënkryetarja e komunës Arta Bajralija, si dhe drejtoresha për Pronë, Kadastër dhe Gjeodezi, Diana Kryeziu. Fokus i diskutimit ishte projekti për Rindërtimin e Kadastrit në Komunën e Kamenicës, i cili përfshin pesë zona kadastrale dhe ka për synim trajtimin e çështjeve komplekse pronësore-juridike, si dhe mospërputhjet ndërmjet gjendjes faktike në terren dhe të dhënave ekzistuese në regjistrat zyrtarë.
Sipas informatave të bëra publike, projekti përfshin zonat kadastrale Hogosht, Karaçevë e Epërme, Karaçevë e Poshtme, Petroc dhe Moqare, dhe parashihet të realizohet përmes rindërtimit të informacioneve kadastrale në bazë të të dhënave tekstuale dhe grafike. Procesi do të zhvillohet në disa faza, përfshirë informimin e qytetarëve, matjet në terren, përpunimin e të dhënave dhe funksionalizimin e një komisioni me përfaqësues nga niveli qendror dhe ai lokal.
Nga Agjencia Kadastrale e Kosovës është bërë e ditur se për këtë projekt tashmë është përzgjedhur operatori ekonomik dhe se, pas përfundimit të fazës përgatitore, pritet të nisë zbatimi në terren.
Gjatë takimit është përmendur edhe projekti REGIP (Real Estate Cadastre & Geospatial Infrastructure Project), i cili ka për qëllim përditësimin dhe harmonizimin e të dhënave kadastrale me sistemet përkatëse. Sipas drejtorit Ahmeti, digjitalizimi i shërbimeve kadastrale, të cilat deri më tani janë ofruar kryesisht në formë fizike, pritet të ndikojë në rritjen e efikasitetit institucional dhe në lehtësimin e qasjes për qytetarët.
Nga ana e komunës është theksuar rëndësia e bashkëpunimit ndërinstitucional, ndërsa nga AKK është bërë e ditur se të dhënat e gjeoportalit pritet të integrohen edhe në platforma më të mëdha digjitale, përfshirë Google, proces i cili, sipas AKK-së, tashmë ka nisur.
Në përfundim të takimit, palët janë shprehur se bashkëpunimi do të vazhdojë edhe në projekte të tjera, me fokus në përmirësimin e shërbimeve kadastrale dhe administrimin e të dhënave mbi pronën.
