“Air Force One” me Trumpin në bord kthehet në bazë shkaku i telasheve elektrike
Aeroplani “Air Force One” është kthyer në bazën “Andrews” të martën vonë, sipas kohës lokale amerikane, me presidentin Donald Trump në bord, pasi pësoi një “problem të vogël elektrik”, ka njoftuar një zyrtare e Shtëpisë së Bardhë, raporton gazeta “The Times”.
Sekretarja e shtypit e Shtëpisë së Bardhë, Karoline Leavitt, ka deklaruar se presidenti Trump ka fluturuar me një aeroplan tjetër në bazë dhe se ka vazhduar fluturimin drejt Zvicrës, ku të mërkurën (21. 01. 2026) pritet të marrë pjesë në Forumin Ekonomik Botëror në Davos.
Nuk është bërë e qartë nëse Trump do të mbërrijë me kohë për fjalimin e planifikuar në orën 14:30, sipas orës lokale në Davos. Ai pritet të takohet më pas me disa liderë botërorë, disa prej të cilëve kanë sfiduar kërcënimin e tij për aneksimin e Grenlandës dhe planet e tij për një “Bord Paqeje” për mbikëqyrjen e armëpushimit ndërmjet Izraelit dhe “Hamasit” në Gazë.
Aeroplani u kthye “nga një kujdes i tepruar” pasi ekuipazhi identifikoi problemin menjëherë pas ngritjes, ka thënë Leavitt. Disa nga dritat e kabinës në avion nuk funksiononin. Ai u ul në orën 23:07 në bazën Andrews.
“Air Force One” është emërtimi që i jepet çdo aeroplani të Forcave Ajrore që transporton presidentin, dhe kjo flotë ka dy Boeing 747 të modifikuar posaçërisht për këtë qëllim. Të dy aeroplanët janë në shërbim qe 35 vjet dhe kanë pasur probleme mirëmbajtjeje. Presidenti Trump është ankuar shpesh për ta.
Përgatiti: Rexhep Maloku – Kallxo.com
