Në përvjetorin e rënies nderohen Heronjtë e Kombit Rexhep Malaj dhe Nuhi Berisha
Në përvjetorin e 42-të të rënies heroike të Rexhep Malajt dhe Nuhi Berishës, dy nga figurat më të shquara të qëndresës kombëtare shqiptare dhe të përpjekjeve për liri, në Gjilan u organizuan një sërë aktivitetesh përkujtimore në kuadër të manifestimit mbarëkombëtar “Flaka e Janarit” 2026.
Aktivitetet nisën me homazhe pranë varrezave të dëshmorëve në Gjilan, ku morën pjesë përfaqësues institucionalë, familjarë të dëshmorëve, përfaqësues të organizatave të dala nga lufta, qytetarë dhe delegacione të ndryshme. Në mesin e tyre ishte edhe delegacioni i Universitetit Publik “Kadri Zeka”, i udhëhequr nga Rektori Prof. Asoc. Dr. Artan Dërmaku, i shoqëruar nga prorektorët, dekanët dhe stafi akademik e administrativ i universitetit.
Delegacioni i UKZ vendosi buqeta lulesh dhe bëri nderime para veprës dhe sakrificës së heronjve, duke kujtuar kontributin e tyre të jashtëzakonshëm në rrugën e lirisë dhe pavarësisë së Kosovës. Pas homazheve, ata vizituan edhe lapidarët e Rexhep Malajt dhe Nuhi Berishës në qytetin e Gjilanit, ku u theksua rëndësia e ruajtjes së kujtesës historike dhe transmetimit të vlerave kombëtare te brezat e rinj.
Në kuadër të këtyre aktiviteteve përkujtimore, Rektori Prof. Asoc. Dr. Artan Dërmaku dhe ekipi i tij bënë homazhe edhe te varri i Ilmi Ramadanit, bashkëveprimtar dhe bashkëudhëtar i lirisë i Rexhep Malajt dhe Nuhi Berishës, anëtar i Këshillit Themelues të Universitetit Publik “Kadri Zeka”, i cili ndërroi jetë vitin e kaluar. Këtë vit, përvjetori i rënies së heronjve u shënua pa praninë fizike të Ilmi Ramadanit, por me kujtimin dhe respektin e përhershëm për kontributin e tij në lëvizjen ilegale, në Ushtrinë Çlirimtare të Kosovës dhe në institucionet e vendit pas çlirimit.
Me këtë rast, u theksua se Ilmi Ramadani ishte një figurë e përkushtuar e rezistencës, i cili deri në fund të jetës së tij mbeti i lidhur me idealet e lirisë dhe me kujtimin e shokëve të tij të rënë. Ndarja e tij nga jeta e bën këtë përvjetor edhe më të ndjerë, duke rikujtuar se brezi i veprimtarëve të hershëm po na lë trashëgimi të çmuar historike dhe morale.
Delegacioni i UKZ-së zhvilloi po ashtu vizita edhe në familjet e dëshmorëve Rexhep Malaj dhe Nuhi Berisha. Gjatë këtyre vizitave, Rektori Prof. Asoc. Dr. Artan Dërmaku shprehu mirënjohjen e thellë për sakrificën sublime të heronjve, duke theksuar se vepra e tyre mbetet një udhërrëfyes i përhershëm për rininë dhe për institucionet e vendit.
“Rexhep Malaj, Nuhi Berisha dhe bashkëveprimtarët e tyre, përfshirë edhe Ilmi Ramadanin, përfaqësojnë një brez që i dha gjithçka lirisë së vendit. Universiteti Publik “Kadri Zeka” do të vazhdojë të kultivojë vlerat e atdhedashurisë, sakrificës dhe përgjegjësisë qytetare, duke i përcjellë këto vlera te studentët tanë,” u shpreh Rektori Dërmaku.
Manifestimi mbarëkombëtar “Flaka e Janarit” mbetet një nga ngjarjet më të rëndësishme përkujtimore, që përmes aktiviteteve kulturore, akademike, mban gjallë kujtimin e figurave emblematike të rezistencës shqiptare dhe forcon ndërgjegjen historike në shoqëri.
