Asambleistja e LDK-së, Afërdita Balaj, tërhiqet nga strukturat e degës së LDK-së, vepron si e pavarur në KK të Gjilanit
Asambleistja e Lidhjes Demokratike të Kosovës dega në Gjilanit, e njohur si zë i fuqishëm sidomos në temat me fokus në fushën e arsimit në këtë komunë, ka njoftuar se nga sot vazhdon rrugëtimin politik dhe aktivitetet e saj si këshilltare komunale e pavarur.
Ajo ka njoftuar simpatizantët dhe votuesit e saj përkitazi me vendimin që ka marrë duke i falënderuar për mbështetjen permanente që ka pasur tek ta, ndonëse nuk ka dhënë hollësi për arsyet e largimit nga struturat e degës së LDK-së.
“Të nderuar anëtarë dhe përkrahës të Lidhjes Demokratike të Kosovës: Me shumë respekt dhe mirënjohje ju falënderoj nga zemra për përkrahjen, besimin dhe bashkëpunimin që më keni dhënë ndër vite. Ju përulem me respekt për çdo rrugëtim të përbashkët, për çdo sfidë dhe çdo arritje që kemi ndarë së bashku”, ka shkruar fillimisht në profilin e saj në rrjete sociale.
Asambleistja Balaj më tej ka njoftuar se pas shumë vitesh angazhimi aktiv, ka vendosur që të reflektoj dhe të tërhiqet nga aktivitetet dhe funksionet që i ka pasur brenda partisë.
“Nga sot, nuk do të mbaj më asnjë post politik. Unë do ta ushtroj mandatin tim si asambleiste e pavarur deri në fund, me përgjegjësi dhe përkushtim. Do të vazhdoj të jem përfaqësuese e qytetarëve të Gjilanit, për nevojat, kërkesat dhe projektet me rëndesi për qytetin. Faleminderit edhe një herë për çdo përkrahje dhe besim! Me respekt e mirënjohje – Afërdita Balaj Ajdini”, ka shkruar ajo në fund të njoftimit publik.
