Një delegacion i UKZ-së po merr pjesë në infosesionin e Komisionit Evropian në Brno të Çekisë
Në qytetin Brnos, në Republikën Çeke, po zhvillohet një prej ngjarjeve më të rëndësishme evropiane për bashkëpunim akademik, Infosession i organizuar nga Komisioni Evropian, me mbështetjen e Agjencive Nacionale të Austrisë, Çekisë, Sllovakisë, Hungarisë dhe Sllovenisë.
Në këtë ngjarje ndërkombëtare, delegacioni i Universitetit Publik “Kadri Zeka” që po merr pjesë, përbëhet nga Rektori, Prof. Assoc. Dr. Artan Dërmaku, Prorektori për Bashkëpunim Ndërkombëtar dhe Projekte, Prof. Dr. Dukagjin Leka, Dekani i Fakultetit të Shkencave Sociale, Prof. Assoc. Dr. Selim Daku, si dhe Drejtori për Buxhet dhe Financa, z. Valon Kllokoqi.
Në këtë organizim që po marrin pjesë përfaqësues të universiteteve nga pothuajse i gjithë kontinenti evropian, por edhe nga Azia, Afrika dhe Amerika, janë mbledhur për të diskutuar për mundësi të reja bashkëpunimi dhe projekte ndërkombëtare.
Për delegacionin e UKZ-së, ky është më shumë sesa një organizim, është një mundësi e çmuar për të zgjeruar rrjetin e partneritetit me universitete jashtë rajonit dhe për të rritur vizibilitetin e institucionit në arenën globale. Gjatë ditëve të Infosessionit, përfaqësuesit e universitetit kanë planifikuar një sërë takimesh bilaterale dhe multilaterale, të cilat do të shërbejnë si bazë për zhvillimin e projekteve të përbashkëta ERASMUS+ CBHE, Jean Monnet, si dhe Erasmus Mundus Design Measures.
Duke marrë pjesë aktivisht në këtë ngjarje, UKZ jo vetëm që forcon bashkëpunimin me partnerët ekzistues, por edhe hap dyert për partneritete të reja ndërkombëtare që do të ndikojnë drejtpërdrejt në cilësinë e arsimit, mobilitetin e stafit, studentëve dhe zhvillimin e projekteve të rëndësishme akademike.
