Profesori Urtak Hamiti përfaqëson UKZ-në në Konferencën Ndërkombëtare “StartUpMorocco SUM25” në Casablanca
Prof. Asoc. Dr. Urtak Hamiti nga Fakulteti i Shkencave Sociale në Universitetin Publik “Kadri Zeka” në Gjilan, po merr pjesë në punimet e Konferencës Ndërkombëtare “StartUpMorocco SUM25”, e cila po zhvillohet në Casablanca të Marokut. Tema qendrore e këtij edicioni është “Building Unicorns and Shaping the Global South – Think Big. Act Small. Build for Impact”.
“StartUpMorocco SUM25” organizohet çdo vit nga një ekip i përbërë nga përfaqësues të universiteteve publike dhe private të Mbretërisë së Marokut. Konferenca zgjat katër javë dhe mbledh pjesëmarrës nga mbarë bota, duke përfshirë përfaqësues të start-up-eve, bizneseve, analistë ekonomikë, bankarë dhe gjeopolitikë.
Qëllimi i saj është shkëmbimi i njohurive mbi mundësitë e zhvillimit ekonomik të kompanive private dhe inovative që nuk janë ende të listuara në bursat e aksioneve. Diskutimet përfshijnë tema si financimet, kornizat ligjore, licencimet, strategjitë e marketingut dhe ndikimet gjeopolitike rajonale.
Profesor Hamiti ka marrë pjesë në dy sesione të përgjithshme më 21 dhe 22 nëntor 2025: “Building Financial Narratives that Inspire Trust” dhe “Fundraising Strategy and Timing”. Ai do të vazhdojë pjesëmarrjen e tij në sesionet e specializuara që do të mbahen gjatë muajit dhjetor.
Gjatë prezantimeve të tij, Prof. Hamiti ka paraqitur potencialin e Kosovës për investime dhe bashkëpunime B2B me kompani ndërkombëtare, duke theksuar rëndësinë e krijimit të një narrative bindëse për investim në fazat fillestare të zhvillimit të një start-up-i, si dhe rolin e financimit inicial (“seed financing”). Në sesionet e mëtejshme, ai ka diskutuar strategjitë e financimit dhe aspektin kohor të tyre, duke përfshirë zhvillimin e produktit ose idesë, marketingun, fushatat promovuese, takimet B2B, komunikimin me Odat Ekonomike, fondet investuese dhe institucionet bankare.
Gjithashtu, Prof. Hamiti ka zhvilluar një takim pune me znj. Lamyaa Lamyaa El Bassiti, EXO e “SUM25”, ku janë shqyrtuar mundësitë e bashkëpunimit të ardhshëm ndërmjet Universitetit Publik “Kadri Zeka” dhe organizatës “SUM25”, në fusha me interes të përbashkët.
