Nis Projekti Erasmus+ MEDIATOR në UKZ
Në Universitetin Publik “Kadri Zeka” në Gjilan nisi sot zyrtarisht takimi fillestar i projektit ndërkombëtar MEDIATOR ku UKZ është koordinator.
Projekti në fjalë është pjesë e programit Erasmus+ CBHE (ERASMUS-EDU-2025-CBHE-STRAND-1). Ky projekt synon modernizimin e arsimit të lartë përmes integrimit të praktikave të ndërmjetësimit, zhvillimit të moduleve akademike inovative dhe përgatitjes së studentëve dhe stafit akademik për sfidat profesionale në Ballkanin Perëndimor dhe Evropë.
Takimi dyditor, i cili po mbahet më 24 dhe 25 Nëntor 2025 në UKZ, mblodhi përfaqësues nga të gjitha institucionet partnere, universitete, kolegje, dhoma të ndërmjetësimit dhe akademi ndërkombëtare. Partnerët që erdhën nga Kosova, Shqipëria, Italia, Letonia dhe Holanda, u pritën në takim nga Rektori i Universitetit Publik “Kadri Zeka”, i cili ju dëshiroi mirëseardhje partnerëve vendorë dhe ndërkombëtarë. Rektori theksoi se për universitetin është nder dhe përgjegjësi e madhe të jetë nikoqir i këtij projekti kaq të rëndësishëm, duke vënë theksin te rëndësia e bashkëpunimit ndërkufitar dhe ndikimi që ky projekt do të ketë në modernizimin e arsimit të lartë.
Ai u shpreh se UKZ është i gatshëm të ofrojë të gjitha kapacitetet e tij akademike dhe institucionale për të siguruar zbatimin me sukses të projektit, si dhe u shprehu mirënjohje të gjithë partnerëve për besimin dhe angazhimin e tyre profesional.
Ndërsa në takimin hapës të projektit, pjesëmarrësit diskutuan planet e implementimit të projektit, ndarjen e rolit të secilit partner dhe strategjitë për të siguruar që projektet e ndërmjetësimit të jenë efektive dhe të qëndrueshme.
Me këtë rast në fjalën e tij, Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, theksoi se ky projekt është një hap i madh drejt modernizimit të arsimit dhe zhvillimit të aftësive profesionale të studentëve tanë. “Ndërmjetësimi nuk është vetëm një proces zgjidhjeje të konflikteve, por një aftësi jetësore që nxit dialogun, bashkëpunimin dhe zgjidhjen e problemeve në mënyrë konstruktive. Me MEDIATOR-in, ne do të krijojmë qendra të reja të ndërmjetësimit dhe do të zhvillojmë module moderne që do të integrohen në programet tona akademike, duke sjellë njohuri dhe praktika evropiane për studentët dhe stafin tonë,” ka thënë Rektori Dërmaku.
Përfaqësuesja e Zyrës Erasmus+ Kosovë, Znj. Mimika Dobroshi, vlerësoi bashkëpunimin ndërkombëtar dhe potencialin e projektit. Ajo tha se Erasmus+ synon të mbështesë projekte që ndikojnë drejtpërdrejt në përmirësimin e cilësisë së arsimit të lartë. “MEDIATOR është një shembull i shkëlqyer i bashkëpunimit ndërkufitar, ky projekt do të përmirësojë jo vetëm kurrikulat akademike, por edhe aftësitë praktike të studentëve dhe stafit, duke u mundësuar institucioneve partnere të krijojnë modele të standardizuara të ndërmjetësimit në rajon,” tha znj. Dobroshi.
Menaxheri i projektit, njëherësh Prorektor për Bashkëpunim Ndërkombëtar dhe Projekte Porf. Dr. Dukagjin Leka, prezantoi objektivat strategjike dhe hapat operativë të projektit.
Ai tha se MEDIATOR është më shumë se një projekt akademik, është një platformë për të bashkuar ekspertët e arsimit dhe profesionistët e ndërmjetësimit për të zhvilluar module mësimore, për të ngritur kapacitetet e stafit akademik dhe për të krijuar qendra funksionale të ndërmjetësimit që do të shërbejnë komuniteteve tona. “Përmes këtij projekti, synojmë të modernizojmë praktikat ekzistuese, të krijojmë mundësi trajnimi për studentët dhe të kontribuojmë në zhvillimin e një sistemi të qëndrueshëm të ndërmjetësimit,” ka thënë prorektori Leka.
Pas fjalimeve hapëse, secili partner prezantoi institucionin e tij dhe rolin e tij në projekt.
Universiteti Publik “Kadri Zeka” , si koordinator i projektit MEDIATOR, shpalosi kapacitetet dhe përvojën e tij akademike, si dhe rolin koordinues në menaxhimin e aktiviteteve të projektit. Universum College prezantoi eksperiencat e tij në edukim dhe gatishmërinë për të zhvilluar module mësimore të integruara me praktikat ndërmjetësuese. Dhoma e Ndërmjetësimit në Kosovë theksoi rëndësinë e forcimit të kapaciteteve profesionale dhe të standardeve të ndërmjetësimit, duke ndarë praktikat e tyre aktuale dhe sfidat rajonale. Universiteti Europian i Tiranës paraqiti kontributin akademik dhe rolin në shpërndarjen e njohurive, si dhe eksperiencat e trajnimit të stafit akademik. Universiteti i Tiranës theksoi rolin e tij në zhvillimin e programeve dhe moduleve të edukimit për ndërmjetësim, duke siguruar një qasje të standardizuar akademike. Dhoma e Ndërmjetësimit në Shqipëri prezantoi përvojat praktike dhe sfidat e ndërmjetësimit në Shqipëri, duke nxjerrë në pah nevojën për kapacitete profesionale të avancuara.
Netherlands Business Academy nga Holanda, paraqiti qasjen inovative të zhvillimit të moduleve dhe krijimin e Qendrës së Ndërmjetësimit, duke integruar metodat teorike dhe praktike. Turiba University nga Letonia shpjegoi planet për trajnimin e stafit akademik dhe ngritjen e kapaciteteve të dhomave të ndërmjetësimit, duke ofruar një perspektivë praktike për implementimin e modulit. Universita Roma 3 (UNIROMA3) nga Italia analizoi praktikat e ndërmjetësimit në Bashkimin Evropian dhe procesin e benchmarking-ut për të nxjerrë në pah standardet më të mira krahas institucioneve të Ballkanit Perëndimor.
Më pas secili pjesëmarrës i projektit prezantuan paketat e punës. UKZ, UET dhe NBA shpalosën strukturën e përgjithshme të projektit dhe qasjen strategjike të implementimit. UKZ dhe UNI prezantuan Paketën e Punës 1, e cila përfshin menaxhimin dhe sigurimin e cilësisë, duke treguar mekanizmat për monitorimin e progresit dhe ruajtjen e standardeve. UNIROMA3 dhe Dhoma e Ndërmjetësimit në Kosovë, në Paketën e Punës 2, prezantuan gjendjen aktuale të ndërmjetësimit në BE dhe krahasimin me institucionet e arsimit të lartë në Ballkanin Perëndimor. NBA, për Paketën e Punës 3, shpalosi planin për zhvillimin e moduleve të reja dhe krijimin e Qendrës së Ndërmjetësimit. Turiba dhe Dhoma e Ndërmjetësimit në Shqipëri, në Paketën e Punës 4, prezantuan aktivitetet për ngritjen e kapaciteteve profesionale dhe trajnimin e stafit. UET dhe UT, për Paketën e Punës 5, diskutuan strategjinë për shpërndarjen e materialeve dhe sigurimin e qëndrueshmërisë së projektit.
Dita e parë u mbyll me diskutime dhe komente përmbyllëse nga UKZ dhe të gjithë partnerët, ku u vlerësua bashkëpunimi ndërkombëtar dhe u theksua rëndësia e angazhimit të përbashkët për të realizuar objektivat e projektit MEDIATOR. Pjesëmarrësit shprehën pritshmëri të madhe për ditën e dytë, e cila do të fokusohet në çështje menaxheriale, marrëveshje partneriteti dhe organizimin e strukturave drejtues të projektit.
