Kamenicë: Kryetari Rahimaj pret në takim përfaqësues nga CNVP
Kryetari i Komunës së Kamenicës Kadri Rahimaj së bashku me Drejtorin për Urbanizëm dhe Planifikim Hapësinor Uran Berisha si dhe Drejtorin për Bujqësi, Pylltari dhe Zhvillim Rural, Shpend Morina, ka pritur në takim Drejtorin e CNVP (Connecting Natural Values and People) Xhevat Lushi me Ardita Dinaj e cila është Këshilltare për Zhvillimin Rural, Ekonomik dhe Promovimit të Biomasës Drunore.
Ata kanë diskutuar rreth ri-hartimit të studimit të fizibilitetit për ngrohjen qendrore të qytetit si dhe mundësive të bashkëpunimit për realizimin e një projekti të tillë për Komunën e Kamenicës.
Ky studim është bërë nga po kjo organizatë, i cili do të prezantohet në Forumin Kombëtar për Biomasë që do mbahet me datën 4 të muajit që vjen, ku në mesin e shumë komunave do të jetë edhe Komuna e Kamenicës.
Në kuadër të këtj forumi ku do të jetë edhe Komuna e Kamenicës, do të ketë edhe komuna të tjera por edhe përfaqësues nga vende të ndryshme që kanë zgjidhje të qëndrueshme për çështjen e ngrohjes, të cilët më pas do të ndajnë me të pranishmit mënyrën e funksionimit si dhe procesit në tërësi sa i përket sistemeve të ngrohjes në këto vende.
Në forum të pranishëm do të jenë edhe përfaqësues bankash dhe donatorësh, që do të shohin mundësitë e gjetjes së formave të bashkëpunimit me komunat që ende nuk kanë gjetur zgjidhje për çështjen e ngrohjes së qytetit.
Kryetari Rahimaj ka mirëpritur edhe këtë hap të rëndësishëm drejt këtij procesi, si dhe ka treguar gatishmërinë e tij për ofrimin e kapaciteteve komunale për realizimin e projektit për ngrohje.
Ata gjithashtu kanë diskutuar edhe format më të mira të implementimit të projektit në fjalë si dhe detajeve të tjera që e presin Komunën e Kamenicës drejt këtij projekti potencial.
Bashkëpunimi me CNVP vjen në kuadër të projektit Shfrytëzimi i Qëndrueshëm i Resurseve Natyrore për Mjedis dhe Zhvillim Ekonomik (SUNREED) i financuar nga Agjencia Suedeze për Bashkëpunim Ndërkombëtarë-SIDA.
Kujtojmë se kjo nuk është hera e parë e bashkëpunimit mes Komunës së Kamenicës dhe CNVP, sepse një bashkëpunim i tillë ka dhënë rezultate edhe në fushën e bujqësisë e pylltarisë.
