Njoftim për situatën pas reshjeve të shiut në Komunën e Kamenicës
Reshjet e shiut këto ditët e fundit, që kanë prekur të gjithë territorin e vendit, kanë prekur edhe Komunën e Kamenicës.
Në shumë vende por edhe në komunën tonë, reshjet e shiut kanë shkaktuar dëme të mëdha në ekonomi familjare, biznese e prona private.
Këto reshje gjithashtu kanë dëmtuar edhe fushën e prodhimtarisë bujqësore, kryesisht në zonën e Koretinit, Topanicës e Roganës.
Nga vlerësimet e para, ka dëme të konsiderueshme të shkaktuara në infrastrukturën rrugore, kanale atmosferike dhe kanale të ujërave të zeza, por nuk ka dëmtime të theksuara në ura për vetura dhe këmbësorë.
Kryetari i Komunës së Kamenicës Kadri Rahimaj së bashku me drejtorët komunal dhe zyrtarë të tjerë kanë qenë sot në vizitë në zonat më të prekura nga reshjet e shiut në Komunën e Kamenicës.
Nga aty kanë parë gjendjen aktuale të dëmeve të shkaktuara si dhe kanë bërë thirrje për qytetarët që të kenë kujdes si dhe të jenë në kontakt të drejtpërdrejtë me autoritetet relevante në rast nevoje për ndërhyrje.
Të gjitha rrugët në Komunën e Kamenicës janë të kalueshme, por kërkohet kujdes nga të gjithë gjatë drejtimit të automjeteve, sidomos në rrugën regjionale Kamenicë-Koretin-Topanicë si dhe në rrugën Kamenicë-Strezoc-Krilevë.
Momentalisht pjesa e lumenjëve në Kamenicë është e menaxhueshme si dhe ka pasur intervenime të shumta në këto pjesë për të zvogëluar gjasat e rrezikut për banorët.
Gjithashtu procesi mësimor deri më tani është realizuar me rregull.
Kryetari Rahimaj falenderon qytetarët dhe kompanitë për bashkëpunimin e deritanishëm, dhe njofton se të gjitha institucionet janë në dispozicion në çdo orë në rast nevoje.
