Ndërron jetë punëtori që aksidentalisht ra nga kati i gjashtë i një ndërtese në Gjilan
Ka ndërruar jetë personi që aksidentalisht kishte rënë nga një lartësi javën e kaluar, saktësisht të premten në Gjilan.
Paraprakisht u raportua se “Një person në Gjilan ka pësuar lëndime të rënda, pasi dyshohet se aksidentalisht ka rënë nga kati i gjashtë i një objekti ndërtimor ku po punonte”.
Ndërsa në njoftimin e policisë nga zëdhënësi për rajonin e Gjilanit, Ismet Hashani, u tha me sa vijon:
“Ju njoftoj se sipas informacioneve fillestare në orët e pasdites së ditës së premte 24.10.2025, një punëtor, nga fshati Kabash KK-Viti i cili kishte qenë duke punuar në një objekt ndërtimor në Gjilan , dyshohet se ka rënë nga kati i gjashtë (6) i ndërtesës. Dyshimet e para janë se i njëjti ka rënë aksidentalisht gjatë kohës që po punonte. Si pasojë e rënies ai ka pësuar lëndime të rënda trupore”, bëri të ditur Hashani.
Më tej u njoftua se i lënduari është dërguar me urgjencë në Shtëpinë e Shëndetit në Gjilan. Sipas mjekut kujdestar, për shkak të lëndimeve të rënda, i njëjti është transferuar menjëherë për trajtim të mëtutjeshëm mjekësor në Qendrën Klinike Universitare të Kosovës në Prishtinë.
Derisa sipas Hashant, në vendngjarje kanë dalë të gjitha ekipet e nevojshme policore , si dhe njësitet përkatëse të hetimeve rajonale, dhe për rastin është njoftuar prokurori i shtetit i cili ka urdhëruar që të ndërmerren veprimet e nevojshme hetimore për të ndriçuar rrethanat e plota të rastit.
