Në UKZ u shënua themelimi i Qendrës Rajonale të Ekselencës Profesionale – CoVE STEM Europe
Në Universitetin Publik “Kadri Zeka” në Gjilan, në praninë e një numri të madh përfaqësuesish të ndërmarrjeve industriale, të menaxhmentit të UKZ-së, të Fakultetit të Shkencave të Aplikuara (FSHA) dhe Fakultetit të Shkencave Kompjuterike (FSHK), u shënua themeli i Qendrës Rajonale të Ekselencës Profesionale – CoVE STEM Europe për Ballkanin Jugperëndimor.
Qendra CoVE STEM Europe në UKZ ka për qëllim të implementojë objektivat e projektit STEM Europe, duke fuqizuar bashkëpunimin ndërmjet arsimit universitar, industrisë dhe inovacionit në fushat e shkencës, teknologjisë, inxhinierisë dhe matematikës (STEM).
Kjo Qendër Rajonale është pjesë e rrjetit ndërkombëtar të qendrave simotra në pesë vende evropiane – Suedi, Holandë, Gjermani, Itali dhe Turqi – me të cilat do të bashkëpunojë ngushtë në përkrahjen e industrisë kosovare dhe rajonale, për t’u përballur me sukses me sfidat që sjell zhvillimi i shpejtë teknologjik dhe inovacioni në fushat STEM. Një ndër synimet kryesore të saj është përgatitja e kuadrove të kualifikuara për tregun bashkëkohor të punës.
Ceremonia u zhvillua në ambientet e Fakultetit të Shkencave të Aplikuara, ku morën pjesë përfaqësues të mbi 15 ndërmarrjeve industriale nga rajoni, si dhe partnerë nga projekti CoVE STEM Europe.
Në emër të Rektorit të UKZ-së, Prof. Asoc. Dr. Artan Dërmaku, të pranishmit i përshëndeti Prof. Dr. Naim Mustafa, Prorektor për Buxhet, Financa dhe Infrastrukturë, dhe Prorektorja për Mësimdhënie dhe Çështjeve të Studentëve Prof. Asoc. Dr. Shpresë Qamili. Prorektori Naim Mustafa theksoi se kjo Qendër përfaqëson një gur themeli për universitetin dhe ekosistemin rajonal të inovacionit, duke lidhur arsimin e lartë, arsimin profesional, kërkimin shkencor dhe industrinë. Në vazhdim theksoi lart rëndësinë e themelimit të kësaj qendre në Universitetin Publik “Kadri Zeka” në Gjilan.
Prorektorja Prof. Asoc. Dr. Shpresë Qamili, në fjalën e saj theksoi se fokusi kryesor është ndërtimi i kapaciteteve në fushat STEM, përmes kurrikulave të përditësuara, laboratorëve praktikë dhe një rrjeti partnerësh që do të mundësojnë praktika profesionale dhe projekte të përbashkëta me industrinë.
Në vijim, Dekani i Fakultetit të Shkencave të Aplikuara, Prof. Dr. Xhevdet Thaqi, njëherësh Koordinator i Projektit CoVE STEM Europe, prezantoi misionin dhe vizionin e Qendrës Rajonale për Ballkanin Perëndimor, duke theksuar rolin e saj në zhvillimin e kapaciteteve teknike dhe teknologjike të ndërmarrjeve industriale, si dhe domosdoshmërinë e bashkëpunimit të ngushtë me bizneset e rajonit për një zhvillim të qëndrueshëm ekonomik e shoqëror. Ai theksoi se CoVE STEM Europe synon të krijojë një mjedis bashkëpunues, ku ekselenca profesionale dhe industria zhvillohen paralelisht, në përputhje me nevojat reale të tregut të punës.
“Ne besojmë se vetëm përmes modernizimit të infrastrukturës mësimore dhe përgatitjes së kuadrove të kualifikuara mund të arrihet një progres i qëndrueshëm në vendet tona,” – u shpreh Prof. Thaqi.
Hapja e Qendrës Rajonale të Ekselencës Profesionale CoVE STEM Europe në Universitetin Publik “Kadri Zeka” përbën një arritje të rëndësishme që e pozicionon Kosovën dhe Gjilanin në hartën e bashkëpunimeve evropiane në fushën e arsimit profesional, teknologjisë dhe inovacionit.
Kjo Qendër pritet të kontribuojë në zhvillimin e kapaciteteve njerëzore, përmirësimin e cilësisë së arsimit, si dhe në krijimin e mundësive të reja për bashkëpunim ndërkombëtar dhe zhvillim industrial.
Në kuadër të ngjarjes u organizua edhe ekspozita e punimeve të studentëve të FSHA dhe FSHK-së, ku u prezantuan projekte praktike dhe inovative në fushat e inxhinierisë, teknologjisë, automatizimit dhe matematikës aplikative. Kjo ekspozitë dëshmoi talentin, kreativitetin dhe përkushtimin e studentëve të UKZ-së për të aplikuar njohuritë e tyre në zgjidhje reale teknologjike.
