Kryetari Basha priti në takim Shefen e Zyrës së Këshillit të Evropës në Kosovë, Mary Ann Hennessey
Kryetari i Kuvendit të Republikës së Kosovës, Dimal Basha, bashkë me nënkryetaren Albulena Haxhiu, priti në takim Shefen e Zyrës së Këshillit të Evropës në Kosovë, Mary Ann Hennessey.
Në këtë takim të frytshëm u diskutua për zhvillimet aktuale në vendin tonë dhe mundësitë e thellimit të bashkëpunimit mes Kuvendit dhe Këshillit të Evropës përmes projekteve të përbashkëta dhe konkrete.
“Bashkëpunimi institucional me Këshillin e Evropës ka dimension të posaçëm për vendin tonë, veçanërisht në fushat që lidhen me forcimin e demokracisë, transparencës parlamentare, sundimin e ligjit dhe mbrojtjen e të drejtave të njeriut. Kuvendi i Kosovës është i përkushtuar për avancimin e standardeve demokratike që e afrojnë vendin tonë edhe më shumë me praktikat më të mira evropiane”, theksoi kryetari Dimal Basha.
Në takim kreu i Kuvendit ritheksoi kërkesën për anëtarësimin e plotë të Republikës së Kosovës në Këshillin e Evropës, duke vlerësuar se vendi ynë i ka përmbushur të gjitha kriteret e parapara dhe se pret të jetë pjesë e kësaj organizate që promovon mbrojtjen e të drejtave themelore të njeriut.
Anëtarësimi në Këshillin e Evropës, theksoi kryetari Basha, do ta shtonte një mekanizëm tjetër në qasje në drejtësi për të gjithë qytetarët tanë pa dallim, duke ofruar të drejtën që t’i adresojnë rastet e tyre të shkeljeve të të drejtave të njeriut në Gjykatën Evropiane për të Drejtat e Njeriut.
Kryetari i Kuvendit falënderoi znj. Mary Ann Hennessey për punën dhe përkushtimin e saj e të institucionit që ajo përfaqëson, për bashkëpunimin e vazhdueshëm dhe mbështetjen e madhe të ofruar për institucionet tona dhe për përparimin demokratik të Republikës së Kosovës.
