Galeria e Arteve – Gjilan, Prezanton: Një pjesë të krijimtarisë artistike të artistit të dëshmuar, Mr. Avni Behluli
Ngjarje artistike – ekspozitë
Gani Bytyçi: – Të dashur miq!
Artistë të të gjitha fushave, artdashës. miq të mij dhe miq të Avniut, javën që vjen, në Galerinë e Arteve në Gjilan, është një ngjarje e rëndësishme kulturore. Artisti, Avni Behluli ekspozon një pjesë të veprës së tij, (skulpturë, instalacion, vizatim dhe pikturë).
Ekspozita hapet më 17 tetor (e premte) 2025, në ora 18.00.
Mirupafshim!
KOMUNIKIM ARTISTIK ME EPOKAT
Në veprën artistike të Avni Behlulit shpalosen epokat, ndërthuren shekujt, jetësohen ngjarjet, skaliten personazhet. Aty shpërfaqen portretet e heronjve, lexohen e kujtohen ngjarjet historike dhe tragjika e tyre. Krijohet mbamendja dhe përjetësohet historia. Aty takojmë luftëtarë e heronj të përmasave kreshnike, si ata të legjendave të lashta. Shohim skena me thyerje shpatash, gërshetim predhash, flijime e rënie në fronte betejash. Aty ndiejmë trishtim për humbje të dhimbshme, por edhe krenari për fitore të mëdha. Por, në veprën e Avniut jetësohen edhe ndjenja më sublime, si dashuria e shenjtërimi i jetës dhe krijimi e mbrojtja e saj. Pastaj kultivimi, ruajtja dhe bartja e trashëgimisë socio-kulturore e filozofike, si testament brezash.
Avniu, me skulpturën e tij, sikur i ka përbashkuar kohët, epokat, shekujt. Sikur e ka zënë me dorë amshimin, për ta sjellë para nesh, si komunikim artistik, si raport ndërmjet jetës, historisë dhe artit, në mënyrë që publiku të mund të krijojë raportin e tij me kohën dhe me artin.
Arti i Avniut është mit. Ai është miti i së kaluarës. Është miti i atdheut dhe i lirisë së tij. Ai është miti i flijimit të luftëtarit. Arti i Avniut është miti i mbijetesës sonë. Ai është miti për femrën. Miti i amësisë së saj. Në veprën e Avniut mit është vendlindja e tij. Është gjuha dhe autoktonia. Është tradita kulturore.
Mit, është vetë arti.
(fragment nga teksti i parathënies së katalogut të ekspozitës)
Isha i nderuar të jem kurator i kësaj ekspozite
