Bersant Celina ‘shpërthen’ ndaj gjyqtares: S’di të referojë, shkaku i saj do të mungojë në derbi
Mesfushori me tipare sulmuese Bersant Celina ka kritikuar gjyqtaren kryesore pasi mori karton të verdhë për të dytën ndeshje radhazi në humbjen e papritur ndaj IFK Varnamo.
Ylli kosovar si zakonisht ishte titullar te AIK-u, megjithatë në minutën e fundit të ndeshjes shkaku i ankesave, u ndëshkua me të verdhë, e si pasojë do t’i mungojë skuadrës në përballjen e ardhshme.
Pas ndeshjes, Celina shpërtheu me kritika ndaj gjyqtares Tess Olofsson, duke i thënë se nuk di të referojë dhe arsyeja se pse reagoi në atë mënyrë ishte sepse kundërshtari e meritonte kartonin e kuq.
“Nuk e di çfarë ndodhi. Di vetëm që kishte një ndërhyrje shumë lart, mbi gju. Për mua është karton i kuq 100 për qind”.
Bersant Celina
“Në fund, përfundoi situata duke marrë unë karton të verdhë, është e pabesueshme. Është 100 për qind karton i kuq, nuk mund t’i ndërhysh një lojtari mbi gju. Ajo (Tess Olofsson) duhet të kuptoj se pse po reagoj në këtë mënyrë”.
“Mora kartonin e dytë të verdhë dhe do të mungojë në ndeshjen e ardhshme sepse ajo nuk di si të referojë”.
Për Celinën, kjo është hera e parë që do të mungojë në një paraqitje për AIK-un, atë në derbin ndaj Hammarbyt.
“Nuk ndjehem mirë. Nuk kam munguar në një ndeshje që kur erdha te AIK-u. Jam i zhgënjyer”.
Përndryshe, Celina nuk është ftuar nga përzgjedhësi Franco Foda për dy ndeshjet e muajit tetor, kur ka zënë vetëm një vend në listën rezervë.
