Njoftim mortor: Ndahet nga jeta Halil Malaj nga Hogoshti
Me dhimbje të thellë njoftojmë se më 24 shtator 2025, në moshën 90-vjeçare, ndërroi jetë veprimtari dhe atdhetari i palodhur Halil Malaj (1936–2025).
I lindur më 26 korrik 1936 në Hogosht, bir i Idriz Malajt – prijës i Luftës së Kikës – dhe i nënës Lakë, Baca Halil ia fali tërë jetën veprimtarisë ilegale dhe çështjes kombëtare shqiptare.
Që nga viti 1970, kur mori rrugën e kurbetit në Mynih të Gjermanisë, e deri në ditët e fundit, veprimtaria e tij ishte e pandarë nga lëvizja ilegale, ku për gati tri dekada ishte strumbullar i shpërndarjes së revistave “Zëri i Kosovës” dhe “Liria”.
Bashkëpunimi me Kadri Zekën, vëllezërit Jusuf e Bardhosh Gërvalla, Hydajet Hysenin, Hasan Malajn, Rexhep Malajn, Gani Sylën, Xhafer Shatrin e shumë të tjerë e bëri atë pjesë të pandashme të historisë së lëvizjes sonë kombëtare.
Krahas punës për mbajtjen e familjes, ai dhe bashkëshortja e tij burrërore, Hazbija, e trasuan rrugën e sakrificës me shtatë fëmijë, katër prej të cilëve përjetuan vite të gjata burgjesh politike, ndërsa vetë Baca Halil për 18 vjet me radhë u detyrua të vinte ilegalisht në vendlindjen e tij.
Ai nuk u thye kurrë, edhe atëherë kur mbi familjen e tij u shkarkua e gjithë egërsia e regjimit serbosllav.
Pas çlirimit dhe shpalljes së pavarësisë së Kosovës, Halil Malaj zgjodhi t’i kalojë vitet e fundit në Hogosht, pranë familjes, duke mbetur gjithnjë simbol i thjeshtësisë, sakrificës dhe dashurisë së pafund për atdheun.
Lamtumira për Bacën Halil do të bëhet në fshatin e tij të lindjes, Hogosht, të enjten më 25 shtator 2025 ora 16, pas namazit të Ikindisë, në mesin e familjes, miqve e bashkëveprimtarëve, të cilëve u la testament besnikërinë ndaj lirisë dhe atdheut.
Gjatë ditës së enjte do të mbahet edhe mbledhje komemorative, (ora 12:30 homazhe, 13 komemoracioni), në Gjilan. Lavdi jetës dhe veprës së tij! /Xhevdet Kallaba/
