Kandidati i LDK-së: Nuk do të pranoj kurrë që qëllimi të arsyetojë mjetin
Kandidati i Lidhjes Demokratike të Kosovës për kryetar të Gjilanit ka reaguar pas mungesës së tij në një debat zgjedhor, duke bërë të ditur se arsyeja lidhej me probleme shëndetësore familjare.
Ai ka kritikuar kundërshtarët politikë për, siç tha, “festimin mbi fatkeqësitë”, duke e cilësuar këtë qasje si mendësi të padenjë. “E kemi parë që këta nuk ngurrojnë të gëzohen me fatkeqësitë e qytetarëve dhe të shfrytëzojnë situatat shëndetësore për përfitime politike. Ky është niveli më i ulët”, tha ai.
Në vijim, kandidati i LDK-së u shpreh se fushata e rivalëve është e bazuar në shpifje e frikë, duke e quajtur atë “shpurdhja e fundit e pushtetit aktual”.
Duke folur për vizionin e tij, ai theksoi se oferta e LDK-së është e mbështetur mbi humanizmin, edukatën dhe dashurinë për njeriun. “LDK-ja dhe unë ofrojmë një standard tjetër, një politikë me fytyrë njerëzore. Fitoren e duam për të mirën e përbashkët, për drejtësinë dhe dinjitetin e qytetarëve tanë”, ka deklaruar ai.
Sipas tij, qëllimi i vetëm është që politika të jetë në shërbim të qytetarëve, duke u bazuar në sinqeritet, drejtësi dhe përkushtim njerëzor.
