Gjilani nikoqir i drejtorëve të Zhvillimit Ekonomik të Kosovës
Në Gjilan u pritën drejtorët e Zhvillimit Ekonomik nga komunat e Kosovës, ku kolegjiumi zhvilloi një takim të veçantë ku u shpalosën arritjet, potenciali dhe vizioni i qytetit tonë.
Enver Shabani, drejtor për Zhvillim Ekonomik, theksoi se po dëshmojnë çdo ditë se ky qytet ka kapacitet për të qenë epiqendra e zhvillimit të projekteve madhore, infrastrukturore apo nisma ekonomike moderne.
“Gjatë takimit u bisedua për unifikimin e rregulloreve komunale për taksat, strategjitë ekonomike zhvillimore, zonat ekonomike si dhe për vizionin lokal ekonomik për të ardhmen. Tema këto që përbëjnë themelin e një zhvillimi të qëndrueshëm dhe të përbashkët për gjithë vendin”, tha Enver Shabani.
Më pas drejtorët e Zhvillimit Ekonomik vizituan qendrën turistike Zip Line Green Valley në Pogragjë, i cili ishte një moment kulmor, aty ku gjelbërimi i luginës, freskia e lumit Morava dhe madhështia e Kalasë së Pogragjës krijojnë një panoramë që mbetet gjatë në kujtesë.
“Ky takim nuk ishte vetëm shkëmbim përvojash, por ishte një dëshmi se bashkëpunimi ndërkomunal dhe mikpritja gjilanase krijojnë ura të reja zhvillimi për tërë Kosovën”, tha drejtori Enver Shabani.
Më tej ai shtoi se me pjesëmarrjen e drejtorëve të zhvillimit ekonomik nga Peja, Gjakova, Deçani, Prizreni, Ferizaj, Shtërpca, e komuna të tjera, Gjilani po vendos standard të ri për atë se si vizioni, energjia dhe bujaria mund të shndërrohen në rezultate konkrete.
“Gjilani, aty ku ekonomia dhe turizmi ecin dorë për dore drejt një të ardhmeje më të ndritur”, tha drejtori i Zhvillimit Ekonomik, Emver Shabani.
