Azerbajxhani dhe Armenia nënshkruajnë marrëveshjen për paqe, Trump: Më në fund ja dolëm
“Më në fund ia kemi dalë të bëjmë paqe”, deklaroi presidenti Donald Trump gjatë ceremonisë së nënshkrimit të marrëveshjes mes Armenisë dhe Azerbajxhanit.
Sipas tij, dy vendet zotohen të ndalojnë përgjithmonë të gjitha luftime, të hapin tregtinë, udhëtimet dhe marrëdhëniet diplomatike, si dhe të respektojnë sovranitetin dhe integritetin territorial të njëri-tjetrit.
SHBA-ja nënshkroi gjithashtu një marrëveshje dypalëshe me të dyja vendet për të zgjeruar bashkëpunimin në fushat e energjisë, tregtisë dhe teknologjisë, përfshirë edhe inteligjencën artificiale.
“Ne gjithashtu po heqim kufizimet në bashkëpunimin mbrojtës midis Azerbajxhanit dhe Shteteve të Bashkuara.”, theksoi Trump.
“Kjo është një çështje e madhe.”
Presidenti i Azerbajxhanit, Ilham Aliyev, dhe Kryeministri i Armenisë, Nikol Pashinyan, dhanë deklarata të rëndësishme lidhur me të ardhmen e rajonit të Kaukazit të Jugut.
Aliyev shprehu gatishmërinë e vendit të tij për të përballuar sfidat dhe për të ndërtuar një të ardhme më të mirë për brezat e rinj: “Ne do ta hapim një faqe të re dhe do t’u sigurojmë fëmijëve tanë një të ardhme të ndritur dhe të sigurt,” tha ai.
Ndërkaq, Kryeministri armen Pashinyan shfaqi një qëndrim paqësor dhe optimist për perspektivën rajonale: “Deklaratat e sotme… japin besim dhe siguri se po hapim një kapitull paqeje, prosperiteti, sigurie dhe bashkëpunimi ekonomik në Kaukazin e Jugut.”, theksoi ai.
Megjithë tonet e ndryshme, të dy liderët treguan gatishmëri për të nisur një fazë të re në marrëdhëniet mes dy vendeve, të cilat kanë kaluar historikisht përmes periudhave të tensioneve të thella.
